کنٹرول لائن پانڈو سیکٹر پر بھارتی فائرنگ، پاک فوج کا بھرپور جواب

ہٹیاں بالا / اسلام آباد: بھارتی فوج نے ایک بارپھرلائن آف کنٹرول پرسیزفائرکی خلاف ورزی کی ہے اور پانڈوسیکٹرمیں بلااشتعال فائرنگ اور گولہ باری کی ہے تاہم کوئی جانی نقصان نہیں جبکہ پاک فوج نے بھرپورجوابی کارروائی کی ہے جس کے بعد بھارتی پوسٹوں کے قریب آگ کے شعلے بلند ہوئے اور ملحقہ جنگل میں آگ لگ گئی۔

بھارتی فوج نے ہفتے کو گزشتہ روز دن گیارہ بجے کے قریب لائن آف کنٹرول کے پانڈو سیکٹر میں بلا اشتعال فائرنگ اورگولہ باری شروع کی جو سہ پہر 3 بجے تک جاری رہی۔ بھارتی فوج نے چھوٹے بڑے ہتھیاروںسے نلئی،گندی گراں، بلاسیھٹو میں سول آبادی کو نشانہ بنایا تاہم جانی نقصان کی اطلاع نہیںملی لیکن کھلانہ ویلی کے بعض تعلیمی اداروں میں طلبہ کو قبل از وقت چھٹی دے دی گئی۔

پاک فوج نے بھارتی فائرنگ کا بھرپور جواب دیا جس کے بعد بھارتی چوکیوںکے قریب آگ کے شعلے بھڑک اٹھے جبکہ ملحقہ جنگل میں آگ لگ گئی، پاک فوج کی جوابی کارروائی کے بعد بھارتی گنوں کو سانپ سونگھ گیا اور سول آبادی نے سکھ کاسانس لیا۔

دوسری جانب اسلام آباد میں مظاہرہ کرتے ہوئے لائن کنٹرول پربھارت کی آئے روزکی اشتعال انگیزیوں سے پریشان حال شہریوںنے حکومت سے متبادل رہائش فراہم کرنے کامطالبہ کردیا۔ کنٹرول لائن پربھارتی فائرنگ کیخلاف شہریوں نے نیشنل پریس کلب اسلام آبادکے باہراحتجاجی مظاہرہ کیا جس میں آزادکشمیرکے علاقوںبٹل، عباسپور، نکیال، درہ شیرخان اور دیگر سیکٹرزکے متاثرین نے بڑی تعداد میں شرکت کی۔ کشمیری حریت رہنما یاسین ملک کی اہلیہ مشعال ملک نے بھی مظاہرین سے خطاب کیا۔

ادھر متاثرہ شہریوں نے بھارتی جارحیت کی سخت مذمت کرتے ہوئے کہا کہ ایل اوسی پربین الاقوامی معاہدے اور قوانین کے مطابق مکمل جنگ بندی کی جائے، حکومت ایل اوسی پررہائش پذیرافرادکے لیے متبادل رہائشی منصوبہ شروع کرے، شہید یا زخمیوں کو معقول معاوضہ فراہم کرے۔