مظفر گڑھ میں زہریلا مشروب پینے سے13 افراد جاں بحق

جاں بحق افراد کا تعلق ایک ہی خاندان سے ہے، اسپتال حکام

ویب ڈیسک ہفتہ 28 اکتوبر 2017

متاثرہ خاندان کے کچھ افراد اب بھی زیر علاج ہیں تاہم ان کی حالت خطرے سے باہر ہے، اسپتال انتظامیہ ۔ فوٹو: فائل

مظفر گڑھ: علی پور میں زہریلا مشروب پینے سے متاثرہ مزید 2 افراد دم توڑ گئے ہیں جس کے بعد جاں بحق افراد کی تعداد 13 ہوگئی۔

ایکسپریس نیوز کے مطابق مظفرگڑھ میں علی پور کے علاقے دولت پور میں ایک ہی خاندان نے زہریلا مشروب پی لیا تھا جس سے ان کی حالت غیر ہوگئی۔

واقعے کے بعد علاقہ مکینوں نے متاثرہ افراد کو اسپتال پہنچایا، جہاں 11 افراد دم توڑ گئے تھے تاہم آج مزید 2 افراد جان کی بازی ہارگئے جس کے بعد ہلاکتوں کی تعداد 13 ہوگئی ہے۔ اسپتال انتظامیہ کا کہنا ہے کہ متاثرہ خاندان کے کچھ افراد اب بھی زیر علاج ہیں تاہم ان کی حالت خطرے سے باہر ہے۔