ترکی میں داعش کے 50 سے زائد مبینہ جنگجو گرفتار

ویب ڈیسک  اتوار 29 اکتوبر 2017
دہشتگرد قومی دن کی تقاریب کو نشانہ بنانا چاہتےتھے، ترک حکام ۔ فوٹو: رائٹرز

دہشتگرد قومی دن کی تقاریب کو نشانہ بنانا چاہتےتھے، ترک حکام ۔ فوٹو: رائٹرز

 انقرہ: ترکی میں داعش کے 50 سے زائد مبینہ جنگجوؤں کو گرفتارکرلیا گیا جو بڑے دہشتگرد حملے کی منصوبہ بندی کررہے تھے۔

ترکی کی سرکاری خبررساں ایجنسی کے مطابق سیکیورٹی حکام نے داعش کے 50 سے زائد مبینہ جنگجوؤں کو گرفتارکرلیا ہے جو ترکی کے یوم جمہوریہ کی تقاریب پر حملے کی منصوبہ بندی میں ملوث ہیں۔

49 مشتبہ افراد کو ترکی کے دارالحکومت انقرہ سے گرفتار کیا گیا جبکہ 4 کو استنبول سے حراست میں لے کر ان کے قبضے سے دیسی ساختہ بم برآمد کرلیا گیا۔ حکام کا کہنا ہے کہ داعش کے مبینہ کارندے ترکی کے 94 ویں قومی دن کے حوالے سے ہونے والی تقاریب کو نشانہ بنانا چاہتےتھے۔ ترکی حکام نے داعش سے تعلق رکھنے والے 55 غیر ملکیوں کے وارنٹ گرفتاری بھی جاری کیے ہیں۔

واضح رہے کہ گزشتہ دو سال کے دوران شدت پسند تینظیم داعش کی جانب سے ترکی میں متعدد خطرناک حملے کئے گئےہیں جس میں ایک حملہ استنبول کے نائٹ کلب میں نئے سال کی تقریب کے دوران کیا گیا تھا جس میں 39 افراد مارے گئے تھے۔ ان حملوں کے بعد سے ترکی کی جانب سے سیکیورٹی کے سخت ترین اقدامات گئے جس کے نتیجے میں دہشتگرد حملوں میں واضح کمی دیکھی گئی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔