اسلام آباد: پمز اسپتال میں زیرعلاج ایبولا وائرس کے مشتبہ مریض کو ڈسچارج کردیا گیا ہے۔
ایکسپریس نیوز کے مطابق ترجمان پمز ڈاکٹر عابدہ کا کہنا ہے کہ اسپتال میں زیرعلاج ایبولا وائرس کے مشتبہ مریض تصور حسین میں وائرس نہیں پایا گیا جب کہ اسے انفیکشن تھا جس کی وجہ سے اس کے بدن پر دھبے نمایاں تھے اور وائرس کی تصدیق نہ ہونے کی صورت میں اسے ڈسچارج کردیا گیا ہے۔
واضح رہے کہ چکوال کے رہائشی تصور حسین کو ایبولا وائرس کے اثرات ظاہر ہونے کے شبہہ میں پمز اسپتال میں داخل کیا گیا تھا جب کہ اس سے قبل افریقی ملک لائیبیریا سے کراچی آنے والے مسافر کو ایبولا وائرس کے خدشہ کے پیش نظر جناح اسپتال کے آئسولیشن وارڈ میں رکھا گیا تھا تاہم علاج کے بعد مریض میں ایبولا وائرس نہیں پایا گیا۔