کراچی: پاکستان کرکٹ بورڈ کے چیرمین شہریار خان کا کہنا ہے کہ خواہش ہے کہ سعید اجمل ورلڈ کپ میں قومی کرکٹ ٹیم کا حصہ ہوں لیکن سعید اجمل کا بwلنگ ایکشن اب بھی 15 دگڑی کے اندر نہیں آ سکا ہے۔
نیشنل اسٹیڈیم کراچی میں میڈیا سے بات کرتے ہوئے شہریار خان کا کہنا تھا کہ سعید اجمل کو ورلڈ کپ میں کھلانے یا نہ کھلانے کا فیصلہ بھارت میں ہونے والے ٹیسٹ کے بعد ہو گا۔ ان کا کہنا تھا کہ خواہش ہے کہ سعید اجمل ورلڈ کپ میں پاکستان کی نمائندگی کریں لیکن یہ فیصلہ سعید اجمل کو خود کرنا ہے کہ وہ آئی سی سی کا ٹیسٹ پاس کر سکتے ہیں یا نہیں جب کہ ان کا بولنگ ایکشن اب بھی 15 ڈگری کے اندر نہیں آ سکا ہے لہذا ورلڈ کپ میں ان کی شمولیت کے حوالے سے کچھ کہنا قبل از وقت ہو گا۔
معین خان کے 2 عہدوں سے متعلق پوچھے گئے سوال کے جواب میں شہریار خان کا کہنا تھا کہ معین خان پر واضح کر دیا ہے کہ وہ کسی ایک عہدے کا انتخاب کر لیں اور بہت جلد اس بات کا فیصلہ ہو جائے گا کہ معین چیف سلیکٹر رہتے ہیں یا پھر منیجر۔