زیڈان نے رئیل میڈرڈ چھوڑنے کا اعلان کر دیا

رئیل میڈرڈ کے منیجر ذین الدین زیڈان نے چیمپئنز لیگ کی فتح کے5 دن بعد کلب چھوڑنے کا اعلان کردیا۔

زیڈان نے ایک نیوز کانفرنس میں یہ اعلان کرتے ہوئے کہا کہ اب اس کلب کو کسی مختلف آواز کی ضرورت ہے۔ ان کا مزید کہنا تھا کہ سب کچھ بدل گیا ہے اور اسی لیے میں نے کلب چھوڑنے کا فیصلہ کیا ہے۔ زیڈان نے 2006 میں رئیل میڈرڈ کی قیادت بطور منیجر سنبھالی تھی، ان کی رہنمائی میں اسپین کے اس کلب نے 3 مرتبہ چیمپئنز لیگ جیتی اور ایک مرتبہ لالیگا کی فاتح بنی۔


زیڈان کا کہنا تھا کہ مجھے اس کلب سے محبت ہے، میری تمام نیک خواہشات اس ٹیم کے ساتھ ہیں لیکن اب انھیں تبدیلی کی ضرورت ہے، اسی لیے میں نے یہ فیصلہ کیا ہے۔

45 سالہ زیڈان نے رافیل بینیتیز کی جگہ یہ عہدہ سنبھالا تھا۔ ان کی رہنمائی میں کلب نے 104 میچ جیتے، 29 برابر رہے۔ ان کی جیت کی شرح 69.8 فیصد رہی جن میں 9 ٹرافیاں شامل ہیں۔ انھوں نے فروری میں کہا تھا کہ اگر انھیں لگا کہ اب کلب کو مزید دینے کے لیے کچھ نہیں تو وہ راستہ بدل لیں گے تاہم ان کا اس موقعے پر اچانک اعلان کرنا باعثِ حیرت ہے۔