کنگنا رناوت آج نئی ایکشن فلم میں منفرد کردار نبھائیں گی

بالی وڈ اداکارہ کنگنا رناوت سنجے گپتا کی نئی ایکشن ڈرامہ فلم ''شوٹ آؤٹ ایٹ وڈالہ''میں آج منفردکردار میں جلوہ گرہونگی۔

کنگنا اس فلم میں اہم کردار نبھارہی ہیں۔ کنگنا فلم میں ودیا جوشی بن کر سلور اسکرین پر اپنی پرفارمنس کی دھاک بٹھانے کی تیاری کرچکی ہیں ۔فلم میں جان ابراہم مرکزی کردار میں نظر آئیں گے ، انیل کپور اے ایس پی بنیں گے جب کہ جیکی شروف پولیس کمشنر کا کردار نبھائیں گے۔ ا داکارہ کنگنا رناوت نے کہا ہے کہرواں سال کے دوران بھی پرستاروں کے درمیان رہوں گی۔ 4 میگا فلمیں ریلیز ہونگی جن میں اہم کردار نبھا رہی ہوں۔ انھوں نے کہا کہ کامیڈی فلم کرنے کا بھی تجربہ کامیاب رہا ہے۔ لوگوں کے چہرے پر مسکراہٹیں بکھیرنا اچھا لگتا ہے اور یہ کام بھی اب کرنا جانتی ہوں۔ رومانوی کردار بھی خوبی سے نبھانے کی کوشش کرتی ہوں۔

آج ریلیز ہونے والی فلم میں ایکشن کردار بھی نبھایا ہے۔ اس فلم کی کہانی کا ایک تسلسل ہے جو شائقین کے لیے دلچسپی کا موجب ہوگی۔ انھوں نے بتایا کہ فلم ''شوٹ ایٹ وڈالہ ''آج ریلیز ہورہی ہے۔اس فلم کے ہدایتکار سنجے گپتا ہیں اور پروڈیوسر بھی وہی ہیں۔ کہانی بھی سنجے گپتا نے حسین زیدی کے ساتھ ملکر لکھی ہے۔ جان ابراہم اور انیل کپور کااس فلم میں اہم کردار ہے۔ سونو سود، منوج باجپائی اور تشار کپور بھی اس میں جلوہ گر ہونگے۔ نئی فلم ''شوٹ آؤٹ ایٹ وڈالہ'' کا میوزک پریتم نے تیار کیا ہے۔ انھوں نے کہا کہ اس کے ساتھ مزید تین فلمیں جن میں ''آئی لو نیویارک''،''کرش تھری ''اور ''انگلی ''شامل ہیں جلد ریلیز ہونگی۔ اداکارہ کا کہنا ہے کہ فلم ''شوٹ آؤٹ ایٹ وڈالہ'' میں منفرد کردار نبھارہی ہوں۔ فلم کی کہانی بھی مختلف ہے اور کردار بھی روٹین سے ہٹ کر ہے۔انھوں نے کہا کہ اپنی پرفارمنس کو مزید بہتر بنانے کی کوشش کی ہے۔


25 سالہ اداکارہ کا کہنا ہے کہ آنیوالی فلموں میں بھی کردار کی ورائٹی ملے گی۔ یکسانیت نہیں چاہتی۔ نئی فلموں میں نئے انداز سے پرفارم کرنے کے لیے کوشاں رہوں گی۔ ادھر ہدایتکار و فلمساز سنجے گپتا کا کہنا ہے کہ آنیوالی فلم میں کنگنا کا کردار اہم ہے ان کی پرفارمنس سے شائقین لطف اندوز ہونگے۔ واضح رہے کہ 20 مارچ 1987 کو پیدا ہونے والی اداکارہ فلمی کیرئیر کا آغاز 2006 میں فلم ''گینگسٹر'' سے کیا۔ اداکارہ نے اپنی پہلی فلم میں عمدہ پرفارمنس سے دھوم مچادی اس پر کنگنا نے بہترین اداکارہ کا فلم فیئر اور نیشنل فلم ایوارڈ جیت لیا۔ اداکارہ ہماچل پردیش کے ضلع منڈی کے علاقے بھمبالہ میں ایک اسکول ٹیچر کے گھر پیدا ہوئیں، ابتدائی تعلیم اسی علاقے میں حاصل کی، کالج پہنچ کر کنگنا دہلی چلی گئیں، جہاں انھوں نے تعلیم کے ساتھ ماڈلنگ شروع کردی، اداکارہ نے ایلیٹ ماڈلنگ ایجنسی جوائن کرلی۔ 2003 میں ماڈلنگ کے ساتھ دہلی میں ہی تھیٹر پر اداکاری کا بھی آغاز کردیا۔



اس عرصے میں انھوں نے اسمتا تھٹر گروپ کے ساتھ ملکر کئی ڈراموں میں پرفارم کیا۔ اداکارہ نے 2004 میں پہلی مرتبہ کیمرے کے سامنے چہرہ نمائی کی۔ اس کے بعد اداکارہ ممبئی چلی گئیں جہاں ہدایت کار انوراگ باسو نے انھیں کام کرنے کی پیشکش کی۔ کنگنا نے انوراگ کی اس پیشکش کو قبول کرتے ہوئے کیرئیر کی پہلی فلم ''گینگسٹر ''میں کام کرکے شائقین فلم کے دل جیت لیے۔ یہ فلم 2006 میں ریلیز ہوئی اور دو قومی ایوارڈز کنگنا کے حصے میں آئے۔ اسی سال اداکارہ نے فلم ''وہ لمحے'' میں ثناء کا کردار نبھایا۔ 2007 کے دوران انھوں نے دو فلموں میں پرفارم کیا ان میں فلم ''شاکالکا بوم بوم'' اور ''لائف ان اے میٹرو'' شامل ہے۔ 2008 میں انھوں نے تامل فلم ''دھوم دھوم '' میں فنکارانہ صلاحیتوں کا مظاہرہ کیا، اسی برس پریانکا کے ساتھ فلم ''فیشن '' میں جلوے دکھائے اور اس فلم پر بھی شائقین کی توجہ حاصل کرنے میں کامیابی ہوئی۔

اس فلم کے لیے انھیں بہترین معاون اداکارہ کا نیشنل فلم ایوارڈ اور فلم فیئر ایوارڈ دیا گیا۔ 2009 میں اداکارہ کی فلم ''راز'' ریلیز ہوئی۔ پھر فلم ''وعدہ رہا میں مختصر کردار نبھایا مگر عمدہ پرفارمنس دی۔ اسی سال فلم ''اک نرنجن '' میں جلوہ گرہوئیں۔ 2010 میں کنگنا رناوت کی 4 فلمیں ریلیز ہوئیں ان میں ''کائٹس''،''ونس اپان اے ٹائم ان ممبئی ''،''ناک آؤٹ''اور ''نو پرابلم ''شامل ہیں۔ 2011 میں فلم ''تنیو ویڈز مینو''، ''گیم''، ''ریڈی''،''ڈبل دھمال''،''راسکلز''اور ''ملیں نہ ملیں ہم'' شامل ہیں۔ 2012 میں کنگنا رناوت کی فلم ''تیز '' میں جلوہ گرہوئیں۔ بالی وڈ اداکارہ کے حوالے سے بالی وڈ حلقوں کا کہنا ہے کہ اداکارہ کی پرفارمنس نے شائقین کو متاثر کیا ہے۔ نئے کرداروں کو خوبی سے نبھانے کا سلیقہ جانتی ہیں۔ ان کی آنیوالی فلموں سے بجا طور پر مثبت توقعات وابستہ کی جاسکتی ہیں۔