’’بے شرم‘‘ میں کام کرنے پر کوئی افسوس نہیں رنبیر کپور

بالی ووڈ اداکار رنبیر کپورنے کہا ہے کہ مجھے فلم''بے شرم'' میں کام کرنے پر کوئی افسوس نہیں کیونکہ انھیں ہر فلم سے کچھ نہ کچھ سیکھنے کو ملتا ہے۔

ایک تقریب میں بات چیت کرتے ہوئے کپور نے کہا: مجھے یہ فلم کرنے پر افسوس نہیں۔ ساری فلمیں کامیاب نہیں ہو سکتیں۔میری پہلی فلم ''سانوریا'' بھی فلاپ ہوئی تھی، ہٹ فلموں کا کوئی فارمولا نہیں۔انھوں نے مزید کہاکہ ''بے شرم'' سے انھیں اپنے والدین اور ابھینو کشپ کے ساتھ کام کا تجربہ ملا۔میں نے غلطیاں کی ہیں اور میں ان سے سیکھنے کی کوشش کر رہا ہوں۔ میں نے کامیابی اور ناکامی دونوں دیکھیں، اور آج میں جس مقام پر ہوں، انھی کامیابیوں اور ناکامیوں کی وجہ سے ہوں۔




رنبیرکپور اب ابھینو کے بھائی انوراگ کشپ کی فلم ''بومبے ویلوٹ'' میں بطور باکسر نظر آئیں گے۔فلم کی چالیس فیصد شوٹنگ مکمل ہو چکی ہے اور یہ اگلے سال دسمبر میں نمائش کے لیے پیش ہو گی۔فلم میں پروڈیوسر کرن جوہر بھی نظر آئیں گے۔اس پر کپور نے اپنے جذبات کا اظہار کچھ یوں کیا: میں جوہر کے ساتھ کام کرنے پر خوش ہوں۔ وہ ایک اچھے اداکار ہونے کے ساتھ ساتھ اپنے کام کے حوالے سے پرجوش ہیں۔پہلے پہل تو میں سوچ رہا تھا کہ ان کے ساتھ اداکاری کیسے کر پاؤں گا لیکن اب سب ٹھیک ہے۔رنبیر کپور انوراگ باسو کی فلم ''جگا جاسوس'' میں بھی کام کریں گے، جس کی شوٹنگ 13 نومبر سے شروع ہو گی۔