شہزادہ چارلس کو تخت برطانیہ سنبھالنے کی جلدی نہیں امریکی جریدہ

برطانوی ولی عہد شہزادہ چارلس کے ایک ساتھی نے انکشا ف کیا ہے کہ شہزادہ چارلس کو تخت برطانیہ سنبھالنے کی کوئی جلدی نہیں کیونکہ پرنس آف ویلزکوخدشہ ہے کہ بادشاہت ان کے لیے ایک قید کی مانند ہوگی۔ یہ بات امریکی جریدے ٹائم میں شہزادہ چارلس کی شائع ہونے والی پروفائل میں ایک گمنام فردکے مطابق کہی گئی ہے۔

ٹا ئم میگزین نے اپنے تازہ شمارے میں شہزادہ چارلس کی تصویر سرورق پر شائع کی ہے اور ان پر شائع ہونے والے مضمون میں شہزادے کے 50دوستوں اور ساتھیوں سے بات کی گئی ہے۔ شہزادہ چارلس آئندہ ماہ سری لنکا میں دولت مشترکہ سربراہ اجلاس میں ملکہ برطانیہ کی نمائندگی کرنے والے ہیں۔


وہ کئی دہائیوں سے ولی عہد کے منصب پر فائز ہیں اور اس دوران وہ اپنے خیراتی کاموں کے لیے مشہور رہے ہیں اور انھوں نے کئی خیراتی اداروں کی بنیاد رکھی ہے تاہم اب جبکہ ملکہ برطانیہ 87برس کی ہو چکی ہیں تو پرنس اف ویلز کو ان کی سرکاری ذمے داریوں میں بھی ہاتھ بٹانا پڑتا ہے۔ٹائم میگزین کے مطابق شہزادہ چارلس ان ذمے داریوں سے زیادہ خوش نہیں اور وہ فکرمند ہیں کہ تخت کی ذمے داریاں ان کے موجودہ کردار پر کیسے اثرانداز ہو سکتی ہیں۔

پروفائل کے مصنف کا یہ بھی کہنا ہے کہ شہزادہ چارلس کے ساتھیوں کے مطابق وہ چاہتے ہیں کہ جیل کے دروازے بند ہونے سے قبل وہ جتنا کام کر سکیں کر لیں۔اس مضمون کے مصنف کے مطابق شہزادے نے جریدے کومستقبل کے بارے میں اپنی خواہشات اورخدشات کے بارے میں بتایایہ مضمون ایک ایسے موقع پرشائع ہوا ہے جب شہزادہ چارلس کے پوتے شہزادہ جارج کے بپتسمہ کی تصاویرمنظرعام پرآئی ہیں۔ان تصاویرمیں ملکہ برطانیہ کومستقبل میں ملک کے 3 بادشاہوں شہزادہ چارلس ان کے بیٹے شہزادہ ولیم اور پوتے شہزادہ جارج کے ساتھ دیکھا جا سکتاہے۔