عباسی شہید اسپتال میں کورونا کی مفت تشخیص کا اعلان

میئرکراچی وسیم اختر نے کہا ہے کہ عباسی شہید اسپتال کی لیبارٹری کو آئندہ ہفتے تک فعال کردیا جائے گا توقع ہے کہ جلد ہی کورونا وائرس کے ٹیسٹ لیبارٹری میں شروع کردیے جائیں گے اور ٹیسٹ کی یہ سہولت شہریوں کو مفت فراہم کی جائے گی۔


میئرکراچی نے کہا کہ طویل عرصے سے عباسی شہید اسپتال کی لیبارٹری کسی ٹیسٹ کے قابل نہیں تھی اب اس میں سول ورک کے بعد جدید آلات لگائے گئے ہیں تاکہ شہریوں کو کورونا وائرس کے ٹیسٹ کی مفت سہولت مہیا کی جاسکے، کراچی کے اسپتالوں میں مریضوں کے لیے گنجائش ختم ہونے کے باعث شہریوں کو شدید پریشانی لاحق ہے اور کے ایم سی کے اسپتالوں میں یہ گنجائش موجود ہے کہ وہاں کورونا وائرس کے مریضوں کے لیے باقاعدہ وارڈ قائم کیے جاسکتے ہیں، عباسی اسپتال میں آئسولیشن وارڈ کے ساتھ آئی سی یو اور ایچ ڈی یو وارڈ بھی قائم کیے جارہے ہیں۔

سینئر ڈائریکٹر میڈیکل سروسز ڈاکٹر بیربل گینانی نے بریفنگ میں بتایا کہ گزشتہ ہفتے پی ڈی ایم اے کی ٹیم نے عباسی شہید اسپتال کا تفصیلی دورہ کیا، ٹیم نے کورونا وائرس وارڈ کے حوالے سے تمام تفصیلات کا جائزہ لیا اور فیصلہ کیا کہ آئندہ ہفتے تک وارڈ فعال کردیا جائے گا اور حکومت سندھ سے درخواست کی جائے گی کہ وہ کورونا وائرس کے ٹیسٹ کے لیے عباسی شہید اسپتال کو تشخیصی کٹس فراہم کریں، عباسی شہید اسپتال میں او پی ڈی کھول دی گئی ہے۔