بورڈ اور قانونی مشیر کے اختلافات کھل کر سامنے آگئے

پاکستان کرکٹ بورڈ اور قانونی مشیر کے درمیان اختلافات کھل کر سامنے آگئے، تفضل رضوی کا کہنا ہے کہ گورننگ بورڈ کا اجلاس بلانے سے قبل سمیت اٹارنی جنرل پاکستان سے مشاورت کی جائے۔

نمائندہ ''ایکسپریس'' سے فون پر بات چیت میں انھوں نے کہا کہ اسلام آباد ہائیکورٹ کے فیصلے میں پی سی بی کی عبوری کمیٹی، گورننگ بورڈ اور نجم سیٹھی کے اسٹیٹس کے بارے میں وضاحت نہیں کی گئی، آئین اور قانون کی رو سے اٹارنی جنرل پاکستان کا چیف لاء آفیسر بھی ہوتا ہے، اجلاس بلانے سے پہلے ان سمیت پرائم منسٹر سیکرٹریٹ سے مشاورت کی جائے۔




انھوں نے کہا کہ یہ پریکٹس نئی نہیں بلکہ ماضی میں بھی پاکستان کرکٹ بورڈ گورننگ بورڈ یا عبوری کمیٹی کے اجلاس بلانے سے قبل اٹارنی جنرل پاکستان سے مشاورت کرتا رہا ہے۔جب تفضل رضوی سے پوچھا گیا کہ کیا وہ گورننگ بورڈ کے اجلاس میں شریک ہوں گے تو انھوں نے کہا کہ بورڈ نے مجھ سے رابطہ کیا نہ ہی مشاورت،ایسے میں کیسے میٹنگ کا حصہ بن سکتا ہوں۔ ایک سوال پر پی سی بی کے قانونی مشیر نے کہا کہ ہفتے کو شیڈول اجلاس غیر آئینی اور غیر قانونی ہے یا نہیں اس پر بات کرنے کے بجائے اتنا ضرور کہوں گا کہ اس پر سوالیہ نشان ضرور ہے۔