شہید پولیس افسر کی نماز جنازہ میں آئی جی کی شرکت

بدھ کو تھا نہ شاہ فیصل کالونی تھانے کی حدود میں فائرنگ کر کے شہید کیے جانے والے سب انسپکٹر نذیر احمدکی نماز جنازہ گزشتہ روز گارڈن پولیس ہیڈ کوارٹرز سائوتھ میں ادا کی گئی۔

تفصیلات مطابق آئی جی سندھ شاہد ندیم بلوچ سمیت ڈی آئی جی ایسٹ و پولیس کے دیگر سینئر افسران اور اہلکاروں کے علاوہ شہید کے ورثا، عزیز و اقارب اور اہلیان علاقہ نے نماز جنازہ میں بڑی تعداد میں شرکت کی اس موقع پر پولیس کے خصوصی دستے نے شہید سب انسپکٹر کو سلامی پیش کی،آئی جی سندھ نے شہید پولیس افسر کے ورثا سے ہمدردی اور تعزیت کا اظہار کرتے ہوئے ان کی محکمانہ خدمات کو خراج عقیدت پیش کیا۔




انھوں نے پولیس کو ہدایات جاری کیں کہ قتل اور دیگر سنگین جرائم میں ملوث عناصر کی گرفتاریوں کے لیے انویسٹی گیشن اور آپریشنل پولیس افسران اشتراکی عمل کے تحت ہر ممکن اقدامات کو یقینی بنائیں اور جائے وقوع سے اکٹھا کردہ شہادتوں اور بعدازاں فارنزک تحقیقات کی روشنی میں انتہائی غیر معمولی اقدامات اختیار کرتے ہوئے ایسے جرائم میں ملوث عناصر کو پولیس اور قانون کی گرفت میں لائیں ،انھوں نے کہا کہ امن امان کے حالات پر کنٹرول اور شہریوں کے جان و مال کے تحفظ کے ضمن میں باالخصوص علاقوں میں پولیس گشت اور اسنیپ چیکنگ میں مزید اضافہ کیا جائے ۔