ریلوے کو منافع بخش بنانے کیلیے کشتیاں جلا کر آیا ہوں سعد رفیق

وفاقی وزیر ریلوے خواجہ سعد رفیق نے کہا ہے کہ ریلوے کو خسارے سے نکال کر منافع بخش بنانے کیلیے کشتیاں جلا کر آیا ہوں۔ حکومت کی نیک نیتی اور محکمے کے افسران اور مزدوروں کی دن رات کی محنت سے مقصد کی طرف تیزی سے پیشرفت جاری ہے۔


مسافروں کی حفاظت کیلیے جو کچھ ممکن ہوا وہ اقدامات اٹھائیں گے اور اس کیلیے عملی اقدامات شروع کر دیے ہیں۔ چین سے انجنوں کی فراہمی آکسیجن کا درجہ رکھتی ہے اور اپنی فیکٹریوں میںبھی بھرپور کام جاری ہے۔ ایک انٹر ویو میں خواجہ سعد رفیق نے کہا کہ مجھے یہ وزارت محمد نواز شریف نے دی ہے اور وہ کارکنوں کی صلاحیتوں بخوبی واقف ہیں۔ انہوں نے کہا کہ میں دعویٰ سے کہہ سکتا ہوں کہ ریلوے میں کوئی میگا کرپشن نہیں اور تمام معاملات شفاف انداز میں آگے بڑھ رہے ہیں۔

انہوں نے کہا کہ ریلوے کی ترقی کیلیے اپنی کشتیاں جلا کر آیا ہوں اور اب تک کے نتائج حوصلہ افزا ہیں۔ ریلوے کے افسران اور مزدور کام کرنا چاہتے ہیں اور انہوں نے کام شروع کر دیا ہے۔ انشا اللہ جلد وہ دن آئے گا جب ریلوے کا خسارہ صفر کر کے اسے منافع بخش ادارہ بنائیں گے۔ انہوں نے کہا کہ حالیہ دنوں میں ریلوے ٹریکس پر ہونے والے نا خوشگوار واقعات سے دلی دکھ ہوا ہے اور میں ریلوے کے ذریعے سفر کرنے والوں کو یقین دلاتا ہوں کہ انکے تحفظ کیلیے ہر ممکن اقدامات اٹھا رہے ہیں اور اس کیلیے جدید نظام لایا جارہا ہے۔ سعد رفیق نے کہا کہ محکمہ ریلوے نے شفاف طریقے سے انجنوں کی خریداری شروع کی ہے اور چین سے انجنوں کی فراہمی محکمے کیلیے آکسیجن کا درجہ رکھتی ہے۔ فریٹ آپریشن کیلیے اقدامات اٹھائے جارہے ہیں جس سے ریلوے کی آمدنی میں بے پناہ اضافہ ہوگا۔