پاکستانی ڈرامہ پھر شہرت کی بلندیوں کو چھونے لگا عدنان صدیقی

معروف اداکارعدنان صدیقی نے کہا ہے کہ ٹی وی ڈراموں کی اندرون ملک اور بیرون ملک شہرت اورمقبولیت کے مثبت رسپانس کے باعث ہمارے ہاں مزید بہترکام ہونے لگا ہے۔


ماضی کی طرح ایک مرتبہ پھر ناظرین کی بڑی تعداد صرف پاکستانی ڈرامے ہی دیکھنا پسند کرتی ہے۔ اس کا کریڈٹ ہمارے پروڈیوسروں، رائٹرز اورڈائریکٹرز کے ساتھ ساتھ فنکار برادری کو بھی جاتا ہے۔ ان خیالات کا اظہارعدنان صدیقی نے ''ایکسپریس''سے بات کرتے ہوئے کیا۔ انھوں نے کہا کہ پاکستانی ڈرامہ ہمیشہ سے ہی اپنی منفرد کہانی، کرداروں کی وجہ سے شہرت کی بلندیوںتک پہنچا ہے۔ ہمارے پڑوسی ملک میں جب سوپ بننے کا رجحان چلا تو کچھ عرصہ کے لیے ہمارا ڈرامہ متاثر ہوا لیکن ڈرامے کا اصل انداز وہی ہے جس پر پاکستان میں کام کیا جا رہا ہے۔

یہی وجہ ہے کہ اس وقت پاکستانی ڈرامہ ہمارے پڑوسی ملک کے ساتھ ساتھ مڈل ایسٹ، برطانیہ، یورپ، امریکا سمیت دیگرممالک میں بے حد پسند کیا جارہا ہے۔ انھوں نے کہا کہ پاکستان میں اب بہت ہی باصلاحیت نوجوان رائٹر، ڈائریکٹراور فنکار کام کررہے ہیں جن سے بہت سی توقعات وابستہ ہیں اور مجھے امید ہے کہ پاکستانی ڈرامہ ترقی اور کامیابی کی بہت سی نئی منزلوں تک پہنچے گا۔