وائلڈ لائف کی فیصل آباد میں کارروائی، سفید ٹائیگر اور افریقی شیر کا بچہ برآمد

وائلڈ لائف رینجرز پنجاب نے غیر قانونی طور پر رکھے گئے خطرناک جنگلی جانوروں کے خلاف کریک ڈاؤن کے سلسلے میں ایک اور بڑی کارروائی کرتے ہوئے فیصل آباد سے ایک سفید ٹائیگر اور افریقی شیر کے بچے کو تحویل میں لے لیا۔

ڈپٹی چیف وائلڈ لائف رینجر ڈاکٹر غلام رسول کے مطابق یہ کارروائی وائلڈ لائف رینجرز فیصل آباد نے خفیہ اطلاع پر کی، جس دوران غیر قانونی طور پر رکھے گئے نایاب نسل کے جانور برآمد کیے گئے۔

تحویل میں لیے گئے سفید ٹائیگر کو لاہور سفاری زو منتقل کر دیا گیا ہے جبکہ افریقی شیر کے بچے کی بھی محفوظ مقام پر منتقلی عمل میں لائی جائے گی۔

حکام کا کہنا ہے کہ اس وقت تک پنجاب کے مختلف شہروں سے مجموعی طور پر 20 سے زائد غیر قانونی طور پر رکھے گئے شیر، تیندوے اور ٹائیگرز برآمد کیے جا چکے ہیں، جنہیں محفوظ مقامات پر منتقل کر کے ان کی دیکھ بھال کی جا رہی ہے۔