عمران خان نے سینیٹ انتخابات کیلئے امیدواروں کی ترجیحی فہرست جاری کردی

پاکستان تحریک انصاف (پی ٹی آئی) کے بانی عمران خان نے سینیٹ انتخابات کے لیے پارٹی امیدواروں کی ترجیحی فہرست جاری کردی۔

 بانی پی ٹی آئی کی جانب سے جاری ترجیحی فہرست کے مطابق سینیٹ کی جنرل نشستوں کے لیے مراد سعید، فیصل جاوید، مرزا آفریدی اور پیر نورالحق قادری، ٹیکنوکریٹ کی سیٹ پر اعظم سواتی اور خواتین کی سیٹ پر روبینہ ناز کو شامل کیا گیا ہے۔

پی ٹی آئی کی سابق سینیٹر ثانیہ نشتر کی خالی کردہ نشست پر مشعال یوسفزئی کے نام پر ٹکٹ جاری کر دیا گیا ہے۔

خیبر پختونخوا کے مشیر اطلاعات بیرسٹر سیف نے عمران خان سے اڈیالہ جیل میں ملاقات کی اور  مشاورت کے بعد عمران خان نے امیدواروں کی ترجیحی فہرست جاری کی ہے۔

بیرسٹر سیف نے کہا کہ جیل انتظامیہ کی جانب سے سہولیات کا انتہائی فقدان ہے، جس پر عمران خان سخت نالاں ہیں، عمران خان اور  بشریٰ بی بی کو جیل میں ذہنی اذیت دینے میں کوئی کسر نہیں چھوڑی جا رہی ہے۔

جیل میں ظلم ڈھانے والے افسران اور متعلقہ حکام کو چھوڑوں گا نہیں، عمران خان

مشیر اطلاعات خیبر پختونخوا نے کہا کہ عمران خان نے بتایا کہ جیل میں انسانی حقوق کی دھجیاں اڑائی جا رہی ہیں، عمران خان نے بتایا کہ وہ قیدِ تنہائی کاٹ رہے ہیں، ٹی وی، اخبار، کتابیں اور یہاں تک کہ کپڑے بھی فراہم نہیں کیے جا رہے ہیں۔

بیرسٹر سیف کا مزید کہنا تھا کہ عمران خان نے بتایا کہ ملاقاتیں بھی نہیں کروائی جا رہی ہیں، جس کی وجہ سے وہ بیرونی حالات سے مکمل طور پر لاعلم ہیں، عمران خان کو وزیراعلیٰ اور دیگر اراکین کے لاہور دورے اور احتجاجی سرگرمیوں کے بارے میں بھی علم نہیں تھا۔

انہوں نے بتایا کہ میں نے انہیں وزیراعلیٰ کے لاہور دورے اور وہاں ہونے والی احتجاجی سرگرمیوں پر بریفنگ دی۔

مشیراطلاعات نے کہا کہ جیل میں بشریٰ بی بی کو بھی ذہنی اذیت دی جا رہی ہے، بشریٰ بی بی کو گندا پانی دیا جا رہا ہے، خوراک میں رکاوٹ ڈالی جا رہی ہے، بشریٰ بی بی کو گزشتہ دنوں زہریلے کیڑے نے پاؤں پر کاٹا تھا جس کی وجہ سے وہ ایک ہفتہ بیمار رہیں۔

بیرسٹر سیف کے مطابق عمران خان نے بتایا کہ رہائی کے بعد جیل میں ظلم ڈھانے والے افسران اور متعلقہ حکام کو چھوڑوں گا نہیں، تمام تر اذیت کے باوجود عمران خان اور بشری بی بی کے حوصلے بلند ہیں۔

انہوں نے بتایا کہ  ملاقات میں سینیٹ انتخابات اور احتجاجی تحریک کے حوالے سے تفصیلی گفتگو ہوئی، عمران خان نے سینیٹ امیدواروں کی ترجیحی فائنل فہرست فراہم کر دی۔

ان کا کہنا تھا کہ ملاقات کے دوران عمران خان نے ملک گیر احتجاج فوری طور پر شروع کرنے کی ہدایت جاری کی ہے اور پارٹی رہنماؤں کے درمیان بیان بازی اور ایک دوسرے کے خلاف سوشل میڈیا مہم پر شدید افسوس اور غصے کا اظہار کیا ہے۔

عمران خان نے سخت ہدایات دیں کہ تمام رہنماؤں کو میرا پیغام پہنچایا جائے کہ وہ ایک دوسرے کے خلاف بیان بازی اور سوشل میڈیا پر مہم چلانے سے باز رہیں، سوشل میڈیا کو آپس میں ایک دوسرے کے خلاف استعمال کرنے کے بجائے پارٹی کا بیانیہ مضبوط بنانے کے لیے استعمال کریں۔

بیرسٹر سیف کے مطابق بانی پی ٹی آئی نے کہا ہے کہ تمام رہنما احتجاجی تحریک کے لیے متحد اور یکسو ہوں۔

ان کا مزید کہنا تھا کہ عمران خان نے وزیراعلیٰ اور تمام ذمہ داران کو احتجاجی تحریک کے سلسلے میں سخت ہدایات جاری کی ہیں کہ وزیراعلیٰ اور تمام ذمہ داران فوری احتجاجی تحریک کا آغاز  کریں۔