2026 بھی جنگ کا سال رہے گا؛ اسرائیلی آرمی چیف نے مزید افرادی قوت مانگ لی
اسرائیلی فوج 2023 سے متعدد محاذوں پر جنگ میں مصروف ہے، ایال ضمیر
اسرائیل کے آرمی چیف لیفٹیننٹ جنرل ایال ضمیر نے خبردار کیا ہے کہ سال 2026 بھی اسرائیل کے لیے مختلف محاذوں پر جنگ کا سال ہوسکتا ہے۔
عالمی خبر رساں ادارے کے مطابق اسرائیلی آرمی چیف نے کہا کہ اکتوبر 2023 سے اسرائیلی فوج مسلسل ایک ملٹی فرنٹ مہم میں مصروف ہے اور یہ رواں بھی جاری رہے گی۔
آرمی چیف نے اس بات پر بھی زور دیا کہ اسرائیلی فوج کو اپنے بڑھتے ہوئے آپریشنل تقاضوں کو پورا کرنے کے لیے مزید اہلکاروں اور جنگجوؤں کی فوری ضرورت ہے۔
اسرائیلی آرمی چیف نے کہا کہ آنے والے برسوں میں فوج کو درپیش بڑھتی ہوئی ذمہ داریوں کے پیش نظر اسرائیل کے لیے ضروری ہے کہ فوجی افرادی قوت میں اضافہ کیا جائے۔
یہ بیان ایسے وقت میں سامنے آیا ہے جب خطے میں کشیدگی بدستور برقرار ہے اور اسرائیل بیک وقت مختلف سیکیورٹی چیلنجز کا سامنا کر رہا ہے۔