آئی پی ایل: ٹرافی اٹھانے کے بعد انوشکا کی ویرات کے آنسو صاف کرتے ویڈیو وائرل

انڈین پریمیئر لیگ (آئی پی ایل) 2026 کا ٹائٹل مسلسل دوسری مرتبہ دوبارہ رائل چیلنجرز بینگلور نے اپنے نام کرلیا۔

فائنل میچ احمد آباد کے نریندر مودی اسٹیڈیم میں کھیلا گیا جس میں سب کی نظریں ویرات کوہلی پر تھیں، جنہوں نے ناقابلِ شکست 75 رنز بنا کر ٹیم کو فتح دلائی۔

کوہلی نے آئی پی ایل میں اپنی تیز ترین نصف سنچری بنائی اور شاندار چھکے کے ساتھ میچ ختم کر کے مداحوں میں جوش و خروش پیدا کر دیا۔

یہ میچ دیکھنے لیے ہزاروں شائقین کے ساتھ ان کی اہلیہ انوشکا شرما بھی اسٹیڈیم میں موجود تھیں جن کی خوشی اور جوش ویڈیو میں وائرل ہوگیا۔

میچ کے اختتام پر انوشکا شرما کوہلی کے ساتھ میدان میں ٹرافی اٹھانے کے موقع پر بھی موجود تھیں اور ٹیم کے جشن میں شریک ہوئیں۔

ان دنوں کی مختلف ویڈیوز سوشل میڈیا پر وائرل ہورہی ہیں۔

ایک ویڈیو میں دیکھا جا سکتا ہے کہ ویرات کوہلی فرط جذبات پر قابو نہ رکھ سکے اور خوشی سے ان کی آنکھوں سے آنسو چھلک پڑے جنہیں انوشکا شرما اپنے ہاتھوں سے صاف کرتی نظر آئیں۔

ویرات کوہلی نے کئی بار انوشکا کو اپنی ’لکی چارم‘ قرار دیا اور ان پر ہونے والی تنقید کا جواب بھی دیا۔