بیجنگ کی سب سے بلند عمارت سے طیارہ ٹکرا گیا، پائلٹ ہلاک، 13 زخمی

چین کے دارالحکومت بیجنگ میں ایک طیارہ شہر کی بلند ترین عمارت سی آئی ٹی آئی سی ٹاور ’’چائنا زن‘‘ سے ٹکرا گیا جس سے پائلٹ ہلاک اور 13 افراد زخمی ہوگئے ہیں۔

امریکی نشریاتی ادارے سی این این کے مطابق طیارے کے فلک بوس عمارت سے ٹکرانے کے فوری بعد بلڈنگ کو خالی کرانا شروع کردیا گیا۔

کچھ ہی دیر میں جائے وقوعہ پر فائر بریگیڈ، پولیس اور ایمبولینسیں فوری طور پر پہنچ گئیں اور امدادی کارروائیاں شروع کر دیں۔

سوشل میڈیا پر وائرل ویڈیوز میں دیکھا جا سکتا ہے کہ 109 منزلہ عمارت سے ملبہ نیچے گر رہا ہے۔ زمین پر طیارے کی دم اور ایک ٹیکسی کی ٹوٹی ہوئی ونڈ اسکرین بھی دیکھی گئی۔

بیجنگ پبلک سکیورٹی بیورو کے ضلعی دفتر سے رابطہ کرنے پر اہلکاروں نے واقعے سے لاعلمی ظاہر کی جبکہ دیگر متعلقہ اداروں سے بھی فوری طور پر کوئی ردعمل سامنے نہیں آیا۔

ابتدائی اطلاعات کے مطابق حادثے کا شکار طیارہ چین میں تیار کیا گیا سن وارڈ اورورا لائٹ اسپورٹ ایئرکرافٹ تھا جو ایک مقامی جنرل ایوی ایشن کمپنی کی ملکیت بتایا جا رہا ہے۔

یہ کمپنی پائلٹوں کی تربیت، تفریحی پروازوں اور فضائی فوٹوگرافی جیسی خدمات فراہم کرتی ہے۔

سوشل میڈیا پر گردش کرنے والے غیر مصدقہ فلائٹ ریڈار 24 کے اعداد و شمار سے ظاہر ہوتا ہے کہ بیجنگ کے شیفوسی ایئرپورٹ سے اڑان بھرنے کے بعد طیارے نے غیر معمولی اور بے ترتیب پرواز کی جس کے بعد وہ چائنا زن ٹاور سے ٹکرا گیا۔

حکام نے حادثے کی تحقیقات شروع کر دی ہیں جبکہ واقعے کی اصل وجہ اور ممکنہ نقصانات سے متعلق مزید تفصیلات سرکاری بیان کے بعد سامنے آنے کی توقع ہے۔