ڈارون ٹیسٹ: اسنیکو تنازع، اسٹیو اسمتھ نے ایج لگنے کا اعتراف کرلیا

آسٹریلیا اور بنگلادیش کے درمیان پہلے ٹیسٹ میچ کے پہلے روز مہمان ٹیم نے حیران کن کارکردگی کا مظاہرہ کرتے ہوئے مضبوط پوزیشن حاصل کرلی ہے۔

ڈارون میں کھیلے جارہے میچ میں آسٹریلیا نے ٹاس جیت کر پہلے بیٹنگ کا فیصلہ کیا تو مہمان ٹیم کی شاندار بولنگ کی بدولت صرف 198 رنز پر آل آؤٹ ہوگئی۔

اسٹیو اسمتھ نے ایک اینڈ سے ٹیم کو سنبھالے رکھا اور 71 رنز کے ساتھ ٹاپ اسکورر رہے تاہم اس اننگز کے دوران ایک موقع پر وہ کاٹ بی ہائنڈ ہوئے لیکن ٹیکنالوجی کے غلط فیصلے کے باعث خوش قسمت رہے۔

بنگلادیش نے امپائر کے ناٹ آؤٹ فیصلے کے بعد ریویو لیا تاہم اسنیکو ٹیکنالوجی میں ایج لگنا ثابت نہیں ہوسکا۔

دن کے اختتام پر پریس کانفرنس میں صحافی نے اسٹیو اسمتھ سے پوچھا کہ کیا ایج لگی تھی جس پر انہوں نے کہا کہ ہاں، مجھے ایسا لگتا ہے۔

انہوں نے ایک اور سوال کے جواب میں کہا کہ ہاں میں خوش قسمت رہا، کبھی کبھی قسمت آپ پر مہربان ہوجاتی ہے۔

ٹیکنالوجی پر بھروسے سے متعلق سوال پر ان کا کہنا تھا کہ یہ اچھی ہے، شاید ایج نہ لگی ہو لیکن میں نے کچھ ایسا محسوس ضرور کیا تھا، لہذا اگر امپائر آؤٹ دیتے تو میں چلا جاتا۔