اسٹیل کے برتنوں کی کھوئی چمک واپس لانے کے چند آسان گھریلو طریقے

کچن میں روزانہ استعمال ہونے والے اسٹین لیس اسٹیل کے برتن وقت گزرنے کے ساتھ بے رونق دکھائی دینے لگتے ہیں۔ کبھی تیل اور چکنائی کے نشانات تو کبھی تیز آنچ پر کھانا جلنے سے بننے والے داغ ان کی صفائی مشکل بنا دیتے ہیں۔

ایسے برتنوں کو دوبارہ صاف ستھرا اور چمکدار بنانے کے لیے مہنگی مصنوعات ضروری نہیں، گھر میں موجود چند عام چیزیں بھی کام آسکتی ہیں۔

معمولی چکنائی کیلئے آسان حل

اگر برتن بہت زیادہ خراب نہیں اور صرف چکنائی یا ہلکے نشانات موجود ہیں تو انہیں کچھ دیر نیم گرم پانی اور ڈش واشنگ لیکویڈ میں بھگو دیں۔

اس کے بعد نرم اسپنج سے صفائی کریں۔ پانی میں بھیگنے کی وجہ سے جمی ہوئی میل نرم ہو جاتی ہے اور زیادہ زور لگائے بغیر صاف ہو سکتی ہے۔

جلی ہوئی دیگچی کو رگڑنے سے گریز

کھانا جل جانے کے بعد اکثر لوگ برتن کو کسی سخت چیز سے کھرچنے لگتے ہیں، لیکن اس طریقے سے اسٹیل کی سطح خراب اور خراش زدہ ہو سکتی ہے۔

ایسی صورت میں سرکہ مددگار ثابت ہو سکتا ہے۔ متاثرہ حصے پر تھوڑا سرکہ ڈال کر کچھ دیر انتظار کریں، پھر نرم اسپنج سے صاف کر کے برتن دھو لیں۔

ضدی داغوں کیلئے بیکنگ سوڈا

اگر داغ آسانی سے ختم نہ ہو رہا ہو تو بیکنگ سوڈا اور تھوڑے سے پانی کو ملا کر گاڑھا آمیزہ تیار کیا جا سکتا ہے۔

اسے داغ پر لگا کر تقریباً آدھے گھنٹے کے لیے چھوڑ دیں اور بعد میں نرم گیلے اسفنج سے صفائی کر لیں۔ آخر میں برتن کو پانی سے اچھی طرح دھونا نہ بھولیں۔

برتنوں کو زیادہ دیر گندا نہ چھوڑیں

برتنوں کی صفائی آسان رکھنے کا ایک طریقہ یہ بھی ہے کہ استعمال کے فوراً بعد بچا ہوا کھانا علیحدہ ڈبوں میں منتقل کر دیا جائے اور دیگچیوں کو طویل وقت تک گندا نہ چھوڑا جائے۔

خاص طور پر کھانا جلنے یا چکنائی جم جانے کی صورت میں جتنی جلد صفائی کی جائے، داغ دور کرنا اتنا ہی آسان رہتا ہے۔

صفائی کے ساتھ ہاتھوں کی حفاظت بھی

بار بار ڈٹرجنٹ اور پانی کے استعمال سے ہاتھ خشک یا حساس ہو سکتے ہیں، اس لیے برتن دھوتے وقت ربڑ یا ڈسپوزیبل دستانے استعمال کیے جا سکتے ہیں۔

صفائی مکمل ہونے کے بعد ہاتھ اچھی طرح خشک کر کے موئسچرائزر لگانا بھی جلد کو خشکی سے محفوظ رکھنے میں مدد دے سکتا ہے۔