پنکج ترپاٹھی انٹرویو کے دوران بھی اہلیہ سے نظریں نہ ہٹا سکے، لائیو شو میں پیار بھرا شکوہ وائرل

بالی ووڈ کے معروف اداکار پنکج ترپاٹھی نے تقریب کے دوران اپنی اہلیہ مردولا ترپاٹھی کو مسلسل موبائل فون استعمال کرتے دیکھ دلچسپ انداز میں ٹوک دیا۔

یہ دلچسپ واقعہ انڈین فلم فیسٹیول آف میلبورن کے دوران پیش آیا جہاں پنکج ترپاٹھی گفتگو کر رہے تھے جبکہ ان کی اہلیہ اوڈینس میں بیٹھی تھیں اور موبائل فون پر مسلسل کچھ ٹائپ کرنے میں مصروف تھیں۔

اہلیہ کی توجہ فون پر دیکھ کر اداکار اپنی بات کے دوران ہی رک گئے اور مزاحیہ انداز میں پوچھا کہ وہ مسلسل کس کو میسج کر رہی ہیں اور کیا ان کی بات سن بھی رہی ہیں؟

پنکج نے مذاق میں یہ بھی پوچھا کہ کہیں مردولا ان کی گفتگو ہی تو ٹائپ نہیں کر رہیں۔ کچھ ہی دیر بعد انہیں اندازہ ہوا کہ اہلیہ غالباً ان کی بیٹی سے بات کر رہی ہیں، جس پر انہوں نے کہا کہ اسے بتادو اس کے والد کا پروگرام شروع ہو چکا ہے۔

پنکج ترپاٹھی کے اس انداز پر تقریب میں موجود شرکا بھی قہقہے لگانے لگے۔

اداکار نے اس دلچسپ لمحے کو اپنی ازدواجی زندگی سے جوڑتے ہوئے بتایا کہ ان کی شادی کو 25 سال ہو چکے ہیں اور وہ گفتگو کے دوران اہلیہ کے چہرے کو دیکھ کر یہ جاننے کی کوشش کر رہے تھے کہ وہ ان کی باتوں پر کیا ردعمل دے رہی ہیں، مگر کافی دیر سے ان کی تمام توجہ موبائل اسکرین پر تھی۔

واضح رہے کہ اپنے کیریئر کے ابتدائی مشکل دور کے حوالے سے پنکج ترپاٹھی ماضی میں بتا چکے ہیں کہ2004 سے 2010 تک ان کی آمدن نہ ہونے کے برابر تھی اور اس دوران گھر کے اخراجات ان کی اہلیہ اٹھاتی تھیں۔