کراچی؛ میر رضا کی لاش ملنے سے قبل 29 جولائی کی رات کیا ہوتا رہا؟ اہم فوٹیج سامنے آگئی

کراچی میں قتل ہونے والے نوجوان تاجر میر رضا کی لاش ملنے سے قبل 29 جولائی کی رات کیا ہوتا رہا، اس حوالے سے اہم سی سی ٹی وی فوٹیج سامنے آگئی ہے۔

تفصیلات کے مطابق رات 3 بج کر 36 منٹ پر ایک مشکوک موٹر سائیکل کو مسجد کے باہر لگے کیمرے کی آنکھ نے محفوظ کیا۔

سی سی ٹی وی فوٹیج میں دیکھا گیا کہ ایک موٹر سائیکل میر رضا کی لاش کے مقام پر سروس روڈ پر کچھ سیکنڈ کے لیے رکی رہی جبکہ صبح 4 بج کر 50 سے 4 بج کر 53 منٹ تک مسجد کے نیچے ایک مشکوک شخص کی موجودگی کا بھی انکشاف ہوا۔

سی سی ٹی وی فوٹیج میں مسجد میں موجود شخص یونیورسٹی روڈ پر پولیس موبائل سے مشابہت رکھتی لائٹ جلتی دیکھتا بھی ہے۔

اس کے بعد صبح 5 بجکر 45 پر یونیورسٹی روڈ پر پولیس اہلکار موبائل سے اتر کر جاتے دیکھائی دیتا ہے جبکہ 5 بج کر 52 منٹ پر پولیس موبائل کو یونیورسٹی روڈ پر سے گزرتے بھی دیکھا گیا۔

لاش ملنے کے مقام سے چند گز کے فاصلے پر پولیس موبائل کی موجودگی کا انکشاف بھی ہوا، جس سے کئی سوالات جنم لے رہے ہیں۔