سابق کپتان وسیم اکرم نے پاکستانی بولر سے متعلق بھارتی صارف کا دعویٰ مسترد کردیا

پاکستان کے سابق کپتان اور لیجنڈری فاسٹ بولر وسیم اکرم نے بھارتی سوشل میڈیا صارف کی جانب سے پاکستانی بولر کے بارے میں کیے گئے ایک دعوے کو مسترد کردیا۔

سوشل میڈیا پلیٹ فارم ایکس پر ایک صارف نے دعویٰ کیا تھا کہ لاہور میں ٹیم کے ایک تربیتی کیمپ کے دوران ایک پاکستانی بولر نے وسیم اکرم کی جانب سے تکنیکی خامی دور کرنے کی کوشش پر مبینہ طور پر انہیں جواب دیا کہ وہ اپنی بولنگ خود جانتا ہے اور اسے وسیم اکرم کی رہنمائی کی ضرورت نہیں۔

صارف نے مزید دعویٰ کیا کہ یہ واقعہ اس وقت پیش آیا جب وسیم اکرم نے قومی ٹیم کی کوچنگ نہ کرنے کا فیصلہ کیا تھا۔

تاہم وسیم اکرم نے براہ راست ردعمل دیتے ہوئے دعوے کو من گھڑت قرار دیا۔ انہوں نے لکھا کہ یہ واقعہ کبھی پیش ہی نہیں آیا اور پاکستان میں ہر شخص، بشمول قومی کرکٹ ٹیم، ان کا بے حد احترام کرتا ہے۔

یہ پہلا موقع نہیں جب وسیم اکرم نے اپنے حوالے سے گردش کرنے والی غلط معلومات کی تردید کی ہو۔ اکتوبر 2025 میں بھی انہوں نے ایک بھارتی میڈیا رپورٹ پر تنقید کی تھی جس میں ہریانہ میں جاسوسی کے الزام میں گرفتار ہونے والے یوٹیوبر وسیم اکرم کی خبر کے ساتھ ان کی تصویر استعمال کی گئی تھی۔

وسیم اکرم نے اس وقت بھی صحافیوں اور سوشل میڈیا صارفین پر زور دیا تھا کہ معلومات شیئر کرنے سے پہلے حقائق کی تصدیق کی جائے۔