ایران معاہدہ کرنا چاہتا ہے مگر صحیح معاہدے کے لیے تیار نہیں، ٹرمپ

امریکی صدر ڈونلڈ ٹرمپ نے کہا ہے کہ ایران اختلافات کے باوجود امریکا کے ساتھ معاہدہ کرنا چاہتا ہے، تاہم تہران ابھی صحیح معاہدے کے لیے تیار نہیں۔

جوائنٹ بیس اینڈریوز سے جنوبی کیرولائنا کے شہر مرٹل بیچ روانگی سے قبل صحافیوں سے گفتگو کرتے ہوئے ٹرمپ نے کہا کہ ایران کے پاس پیسہ، بحریہ اور فضائیہ نہیں جبکہ وہ اپنے فوجیوں اور پولیس اہلکاروں کو بھی تنخواہیں ادا نہیں کر رہا۔

ٹرمپ نے دعویٰ کیا کہ ایران میں افراطِ زر 350 فیصد تک پہنچ چکا ہے۔ انہوں نے کہا کہ اب دیکھنا ہوگا کہ صورتحال کیا رخ اختیار کرتی ہے۔

امریکی صدر نے آبنائے ہرمز کی ناکہ بندی کا حوالہ دیتے ہوئے کہا کہ امریکا کو پورے خطے پر مکمل کنٹرول حاصل ہے جس میں آبنائے ہرمز اور اس سے متصل زمینی علاقے بھی شامل ہیں۔