ماضی کی مقبول اداکارہ اب کس حال میں ہیں؟ فلم’راز‘کے بعد سے منظرعام سے غائب تھیں

2000 کی دہائی کے آغاز میں اپنی خوبصورتی، ماڈلنگ اور میوزک ویڈیوز سے شہرت حاصل کرنے والی اداکارہ مالینی شرما آج فلمی دنیا کی چکاچوند سے دور ایک بالکل مختلف زندگی گزار رہی ہیں۔

بھارتی میڈیا کے مطابق مالینی شرما کو بالی ووڈ کامیاب ترین فلموں میں سے فلم ’راز‘ میں بپاشا باسو اور ڈینو موریا کے ساتھ شہرت کی بلندی پر پہنچا دیا تھا۔

فلم کے گانے ’آپ کے پیار میں‘ میں ان کی موجودگی نے خاصی شہرت حاصل کی تھی تاہم فلمی کیریئر عروج کی جانب بڑھنے کے باوجود انھوں نے آہستہ آہستہ شوبز سے کنارہ کشی اختیار کرلی تھی۔

مالینی شرما نے 2000 کی دہائی میں میوزک ویڈیوز کا معروف چہرہ تھیں۔ انھیں بمبئی وائکنگز کے مقبول گانے ’کیا صورت ہے‘ سے بھی خاص پہچان ملی جبکہ وہ میکا سنگھ کے گانے’ساون میں لگ گئی آگ‘ میں بھی نظر آئیں۔

انہوں نے ٹی وی ڈراما ’CATS‘ میں بھی کام کیا جس میں نفیسہ جوزف اور کلجیت رندھاوا سمیت دیگر اداکار شامل تھے۔

فلم ’راز‘ کے بعد کیا راز سامنے آیا؟

2002 میں وکرم بھٹ کی ہدایت کاری میں بننے والی فلم ’راز‘ کامیاب رہی اور مالینی شرما بھی اس کا حصہ تھیں۔ اسی دوران انہوں نے فلمی دنیا میں مزید کام کرنے کے بجائے اپنی زندگی کا رخ تبدیل کرنا شروع کردیا۔

رپورٹس کے مطابق انہوں نے فلم انکاؤنٹر کی شوٹنگ شروع ہونے سے صرف 48 گھنٹے قبل معذرت کرلی تھی اور فلمی دنیا کو خیرباد کہہ کر ایک مختلف طرز زندگی اختیار کرلی۔

فلمی دنیا سے دور ہونے کے بعد مالینی شرما نے ’دی سلو لوکل‘ کے نام سے ایک منصوبہ شروع کیا جس کا محور مقامی کھانے، دستکاری اور مختلف تخلیقی سرگرمیاں تھیں۔

اب وہ پونے کے قریب سہیادری پہاڑیوں میں ایک فارم ہاؤس چلاتی ہیں۔ یہاں وہ اپنی ضرورت کی سبزیاں خود اگاتی ہیں اور فارم سے حاصل ہونے والی تازہ پیداوار سے مہمانوں کے لیے کھانے بھی تیار کرتی ہیں۔

یعنی کبھی فلمی پردے پر نظر آنے والی ملینی اب کیمروں اور فلمی سیٹ کے بجائے کھیتوں، سبزیوں اور پرسکون ماحول میں وقت گزار رہی ہیں۔

اس بات کا انکشاف 23 سال بعد اس وقت ہوا جب ملینی شرما حال ہی میں ایک شو  ’The Slow Local Diaries‘ میں کیمرے کے سامنے آئیں اور اپنی زندگی کے تجربات شیئر کیے۔

انھوں نے اپنے پہلے ویڈیو پیغام میں مداحوں کو بتایا کہ ’راز‘ کے تقریباً 23 برس بعد اب وہ اپنی زندگی کی اصل تصویر دکھانا چاہتی ہیں جو بالی ووڈ کی چکاچوند اور گلیمرس دنیا سے دور لیکن فطرت کے نہایت قریب ہے۔

یاد رہے کہ اداکارہ مالینی شرما نے ساتھی اداکار پریانشو چیٹر جی سے شادی بھی کی تھی تاہم یہ رشتہ چند برس بعد طلاق پر ختم ہوگیا تھا۔