بیمار شوہر اور گھر کے اخراجات، معروف پاکستانی اداکارہ سڑک کنارے روزی کمانے پر مجبور

کبھی ٹی وی اسکرین اور اسٹیج پر اپنی اداکاری سے ناظرین کی توجہ حاصل کرنے والی پاکستانی اداکارہ مسکان ملک آج معاشی مشکلات کے باعث کوئٹہ کی سڑکوں پر دودھ کی ٹھنڈی بوتلیں فروخت کر کے اپنے گھر کا خرچ چلانے پر مجبور ہیں۔

مسکان ملک نے اپنی موجودہ صورتحال کے بارے میں بتایا کہ بے روزگاری، شوہر کی بیماری اور بڑھتے گھریلو اخراجات نے انہیں سڑک کنارے کام کرنے پر مجبور کر دیا مگر انہوں نے آج بھی خود کو فن کی دنیا سے الگ نہیں کیا۔

اداکارہ کا کہنا تھا کہ مجبوریاں انہیں سڑک تک لے آئیں جہاں وہ دودھ کی ٹھنڈی بوتلیں فروخت کر رہی ہیں لیکن انہیں اب بھی امید ہے کہ اداکاری کا کام ملے گا اور وہ دوبارہ اپنے فن کی طرف لوٹیں گی۔

مسکان ملک نے محض 13 سال کی عمر میں اداکاری کا آغاز کیا تھا اور اپنے فنی سفر کے دوران متعدد ٹی وی ڈراموں اور اسٹیج پروڈکشنز میں کام کیا۔