ای پاسپورٹ حصول کے خواہشمند شہریوں کیلئے خوشخبری، نادرا سینٹر پر سہولت دستیاب

حکومت کی جانب سے ملک بھر میں ای پاسپورٹ کے خواہش مند شہریوں کے لیے خوش خبری دی گئی ہے اور 7 ستمبر سے نادرا کے تمام سینٹرز پر ای پاسپورٹ بنوانے کی سہولت دستیاب ہوگی۔

ذرائع کے مطابق کراچی سمیت پاکستان بھر کے نادرا سینٹرز سے شہری اب ای پاسپورٹ کی تجدید اور ری پرنٹ کروا سکیں گے۔

محکمہ پاسپورٹس اور نادرا کے مابین معاہدے کے تحت یہ سہولت فراہم کی جائے گی، نئے ای پاسپورٹ کا اجرا اور نئے مشین ریڈایبل پاسپورٹس کا اجرا حسب سابق صرف پاسپورٹ دفاتر سے ہی ہوگا۔

نادرا میگا سینٹرز میں قائم پاسپورٹ کاؤنٹرز سے نئے ای پاسپورٹس اور مشین ریڈایبل پاسپورٹس کا اجرا سابقہ طریقہ کار کے مطابق جاری رہے گا، نادرا دفاتر میں موجودہ پاسپورٹ کاؤنٹرز کو بتدریج ختم کر کے عملے کو واپس بلایا جائے گا۔

حکام کا کہنا تھا کہ اس اقدام کا مقصد شہریوں کو ای پاسپورٹ کی تجدید کے لیے ایک ہی چھت تلے سہولت فراہم کرنا اور رش کم کرنا ہے، شہری 7 ستمبر سے اپنے قریبی نادرا سینٹر جا کر ای پاسپورٹ کی تجدید اور ری پرنٹ کی سروس حاصل کر سکیں گے۔