کراچی، کون سی شاہراہ بند ہے، اور کون سی سڑک ٹریفک کے لیے کھلی ہے؟ ٹریفک پولیس نے بتا دیا

ٹریفک پولیس نے شہر کی مختلف شاہراہوں پر ٹریفک کی تازہ صورتحال سے آگاہ کرتے ہوئے بتایا ہے کہ گرومندر سے نمائش آنے اور جانے والی سڑک ٹریفک کے لیے کھول دی گئی ہے۔

ترجمان ٹریفک پولیس کے مطابق سڑکوں پر رکھے گئے کنٹینرز بھی ہٹا دیے گئے ہیں، جس کے بعد متعدد مقامات پر ٹریفک کی روانی بحال ہوگئی ہے۔

ترجمان ٹریفک پولیس کے مطابق راشد منہاس روڈ پر نیپا آنے اور جانے والے دونوں اطراف ٹریفک کی روانی بحال کردی گئی ہے، جبکہ مین یونیورسٹی روڈ پر نیپا سے سمامہ کی جانب بھی ٹریفک کی روانی بحال ہے۔

تاہم نمائش چورنگی سے جناح گراؤنڈ جانے والے راستے پر تاحال کنٹینرز موجود ہیں اور یہ راستہ ٹریفک کے لیے بند ہے۔

واضح رہے کہ گزشتہ رات سیکیورٹی خدشات کے پیش نظر لائنز ایریا کے اطراف تمام سڑکیں بند کردی گئیں تھیں جس کے باعث شہر کی متعدد اہم شاہراہوں پر ٹریفک کی روانی شدید متاثر ہونے سے بدترین ٹریفک جام ہوگیا تھا۔

سپر ہائی وے کی دونوں سڑکیں ٹریلر لگا کر بند کردی گئیں تھیں جس کے باعث سہراب گوٹھ پر شدید ٹریفک جام ہوا اور سپر ہائی وے جانے والے شہری کئی گھنٹوں سے ٹریفک میں پھنسے رہے جبکہ بحریہ ٹاؤن جانے والے شہری بھی طویل ٹریفک جام کا سامنا کرنا پڑا۔؎

لکی ون سے گلشن اقبال جانے والا روڈ بھی ٹریفک کے لیے بند ہے، جبکہ نمائش چورنگی اور ایم اے جناح روڈ سمیت جناح گراؤنڈ جانے والے راستے بھی بند کردیئے گئے ہیں۔

شہر کی بیشتر شاہراہوں پر ٹریفک کا دباؤ بڑھنے سے شہریوں کو گزشتہ شدید مشکلات کا سامنا کرنا پڑا۔