شاہ فیصل پل پر دلہا دلہن اور باراتیوں کا ٹریفک روک کر ڈانس، ویڈیو وائرل

کراچی کے مصروف شاہ فیصل پل پر اس وقت دلچسپ صورت حال پیدا ہوگئی جب باراتیوں نے گاڑیاں روک کر سڑک پر جشن منانا شروع کردیا۔ دلہا دلہن نے بھی پل پر ہی رقص کیا، جس کی ویڈیو سوشل میڈیا پر سامنے آتے ہی تیزی سے وائرل ہوگئی۔

رپورٹس کے مطابق چند روز قبل ایک شادی کی بارات شاہ فیصل پل سے گزر رہی تھی کہ باراتیوں نے اپنی گاڑیاں سڑک پر روک دیں۔ اس کے بعد دلہن، دلہا، دوستوں اور رشتہ داروں سمیت دیگر افراد گاڑیوں سے باہر نکل آئے اور پل پر ہی ناچ گانا شروع کردیا۔

سوشل میڈیا پر گردش کرنے والی فوٹیج میں دلہا اور دلہن کو پل پر رقص کرتے دیکھا جاسکتا ہے، جبکہ ایک شخص پل کی دیوار پر چڑھ کر اس منظر کی ویڈیو بناتا بھی دکھائی دیتا ہے۔ باراتیوں نے پل کی ایک جانب ٹریفک روک کر جشن منایا جبکہ دوسری جانب سے گزرنے والے شہری حیرت سے یہ منظر دیکھتے رہے۔

شادیوں میں دلہن اور اس کی سہیلیوں کا رقص کوئی نئی بات نہیں، اسی طرح شادی ہالز اور بینکوئٹ میں بارات کے منفرد استقبال بھی معمول بن چکے ہیں، تاہم سڑک اور پل کو ہی رقص گاہ بنا دینے کا رجحان اب سوشل میڈیا پر توجہ حاصل کررہا ہے۔