کنگ چارلس کے شاہی حیثیت سے متعلق خط پر شہزادہ ہیری اور میگھن مارکل حیران

برطانیہ واپس منتقل ہونے کے بعد شہزادہ ہیری اور میگھن مارکل کی شاہی حیثیت واضح کرنے کیلئے کنگ چارلس کی ہدایت پر جاری کیے گئے خط پر جوڑے نے حیرانی کا اظہار کیا ہے۔

ہیری اور میگھن کے ترجمان کا کہنا ہے کہ انہیں خط کے عوامی سطح پر جاری کیے جانے کے بارے میں پیشگی اطلاع نہ ملنے پر ’کچھ حیرت‘ ہوئی۔

محل کے ذرائع نے دعویٰ کیا ہے کہ خط منظرِ عام پر آنے سے پہلے ہیری کی ٹیم کے ساتھ شیئر کیا گیا تھا، البتہ اس کے مندرجات پر ان سے مشاورت نہیں کی گئی تھی۔

یہ خط ایسے وقت سامنے آیا ہے جب شہزادہ ہیری برطانیہ میں 24 گھنٹے مسلح پولیس سیکیورٹی کی بحالی کے خواہاں ہیں، تاہم شاہی محل کے ذرائع کا کہنا ہے کہ خط کا سیکیورٹی سے متعلق جاری معاملات سے کوئی تعلق نہیں۔

خط کے مطابق ہیری اور میگھن کیلئے ’ہز اور ہر ہائینیس‘ کے خطابات بدستور غیر فعال رہیں گے اور انہیں استعمال نہیں کیا جائے گا۔