میر رضا قتل کیس؛  بزنس پارٹنر اور وینڈر کے نام پولیس چالان میں شامل نہیں

سٹی کورٹ میں ایڈیشنل ڈسٹرکٹ اینڈ سیشن عدالت شرقی کے روبرو میر رضا قتل کیس میں بزنس پارٹنر احمد اور وینڈر عبداللہ کی درخواست ضمانت کی سماعت ہوئی۔

سماعت کے موقع پر درخواست گزار احمد، عبداللہ اور تفتیشی افسر عدالت میں پیش ہوئے۔ دوران سماعت احمد اور عبداللہ کے وکیل نے درخواست ضمانت واپس لے لی۔

وکیل خالد ممتاز ایڈووکیٹ نے عدالت کو بتایا کہ پولیس چالان میں درخواست گزاروں کا نام شامل نہیں۔ اس پر عدالت نے تفتیشی افسر سے استفسار کیا کہ کیا درخواست گزاروں کا نام چالان میں شامل نہیں؟

تفتیشی افسر نے عدالت میں چالان کی نقول جمع کروا دیں اور عبوری چالان میں احمد اور عبداللہ کے نام شامل نہ ہونے کی تصدیق کردی۔

عدالت نے استفسار کیا کہ مدعی مقدمہ کہاں ہیں؟ سرکاری وکیل نے عدالت کو بتایا کہ مدعی مقدمہ پیش نہیں ہوئے۔

عدالت نے کہا کہ آرڈر میں درخواست ضمانت واپس لینے کی وجوہات نہیں لکھی جا رہیں۔ بعد ازاں عدالت نے احمد اور عبداللہ کی درخواست ضمانت نمٹا دی۔

بعد ازاں میر رضا کے بزنس پارٹنر اور وینڈر کے وکیل خالد ممتاز نے میڈیا سے گفتگو کرتے ہوئے بتایا کہ میرے موکل احمد اور عبداللہ کا نام ملزمان میں نہیں ہے ۔ پولیس سے احمد اور عبداللہ کو اب کوئی خطرہ نہیں۔ اس لیے ہم نے درخواست ضمانت واپس لے لی ہے۔

انہوں نے کہا کہ احمد میر رضا کا بزنس پارٹ ضرور تھا لیکن  قاتل نہیں ہے۔ جوڈیشل کمیشن میں ہمیں مؤقف نہیں کرنے کا موقع نہیں دیا۔ ہمیں جوڈیشل کمیشن پر اعتماد نہیں ہے۔ کمیشن اگر طلب کرے تو جائیں گے لیکن ہم کمیشن کو نہیں مانتے۔

وکیل نے کہا کہ ہم نے جو بات کی، وہی بات ایڈووکیٹ جنرل نے کہا۔ جبران ناصر سارا دن کیس کے متعلق سوشل میڈیا اور میڈیا پر لگا رہتا ہے۔ ہم تفتیش میں شروع سے شامل ہیں۔