آئی فون 17 کی عالمی قیمتوں میں کمی، ایپل کی جانب سے اضافہ

ٹیکنالوجی کمپنی ایپل کی آئی فون 17 سیریز کی قیمتوں میں گزشتہ چند ہفتوں کے دوران بار بار کمی دیکھی گئی ہے، جس میں آئی فون 17 پرو میکس پر سب سے بڑی رعایت دی جا رہی ہے۔ ریٹیلرز موجودہ اسٹاک ختم کرنے کے لیے قیمتوں میں مزید کمی کر رہے ہیں۔

دوسری جانب ایپل نے بیس ماڈل آئی فون 17 کی قیمت میں 100 ڈالر کا اضافہ کر دیا ہے۔ پرانے ڈیوائسز کی قیمتوں میں اضافہ ایپل کے لیے 2026 سے پہلے ایک غیر معمولی اقدام تھا لیکن رواں سال بڑی ٹیک کمپنیوں میں یہ رجحان عام ہوتا جا رہا ہے۔ سام سنگ نے بھی اپریل میں گلیکسی زیڈ فولڈ 7 کے ساتھ بالکل ایسا ہی کیا تھا۔

اب جبکہ آئی فون 17 پرو اور آئی فون 17 پرو میکس کی پیداوار بند کر دی گئی ہے، ان فونز کی باقی ماندہ انوینٹری ختم کرنے کے لیے ریٹیلرز کی جانب سے مزید رعایتیں دی جا رہی ہیں، جس سے ان ماڈلز کی دستیابی کا وقت بھی محدود ہوتا جا رہا ہے۔

آسٹریلیا میں جے بی ہائی-فائی نے بیس آئی فون 17 کی قیمت 1499 آسٹریلوی ڈالر کی لانچ قیمت سے کم کرکے 1399 آسٹریلوی ڈالر کر دی ہے۔

جرمنی میں میڈیا مارکیٹ پر آئی فون 17 پرو میکس کا 256 جی بی ماڈل 1329 یورو میں دستیاب ہے، جو اس کی 1449 یورو کی لانچ قیمت کے مقابلے میں 120 یورو کم ہے۔

برطانیہ میں ایمازون اب بھی آئی فون 17 پرو کو 999 پاؤنڈ اور آئی فون 17 پرو میکس کو 1099 پاؤنڈ میں فروخت کر رہا ہے۔ دونوں فونز ایپل کی برطانیہ میں آفیشل قیمتوں کے مقابلے میں 100 پاؤنڈ سستے ہیں۔ آئی فون ایئر کا 512 جی بی ماڈل بھی ایمازون پر 200 پاؤنڈ کی رعایت کے ساتھ دستیاب ہے۔

ایپل آئی فون 17 کی قیمت کیوں بڑھا رہا ہے؟

آئی فون 18 پرو کے اعلان کے فوراً بعد ایپل نے اپنے اسٹورز پر آئی فون 17 سیریز کی قیمت میں 100 ڈالر کا اضافہ کر دیا۔ اس اضافے کی بنیادی وجہ وہی میموری بحران ہے جس کے باعث آئی فون 18 پرو کی قیمتیں بھی بڑھ رہی ہیں۔

2026 کے دوران مختلف کمپوننٹس کی لاگت میں نمایاں اضافہ ہوا ہے اور ایپل نے اس اضافی لاگت کا بوجھ دو نسلوں کے آئی فونز کے صارفین تک منتقل کرنے کا فیصلہ کیا ہے۔

یہ صرف ایپل تک محدود نہیں۔ گوگل نے اگست میں پکسل 11 سیریز کی لانچ قیمت پکسل 10 سیریز کے مقابلے میں تقریباً 100 ڈالر بڑھا دی۔ اسی طرح سام سنگ کی گلیکسی ایس 26 سیریز بھی ایس 25 کے مقابلے میں زیادہ قیمت پر لانچ ہوئی جبکہ گلیکسی زیڈ فولڈ 7 کی قیمت لانچ کے سات ماہ بعد بڑھا دی گئی۔

اس کے علاوہ گلیکسی زیڈ فولڈ 8 الٹرا کی لانچ قیمت بھی گلیکسی زیڈ فولڈ 7 کے مقابلے میں 200 ڈالر زیادہ رہی۔

تاہم، گلیکسی زیڈ فولڈ 8 کو 1899 ڈالر کی قیمت پر لانچ کیا گیا جو زیڈ فولڈ 7 کی قیمت کے برابرتھی حالانکہ اس کے پرزوں کی لاگت زیادہ تھی۔ ایک اندازے کے مطابق سام سنگ نے متعارف کرائے گئے آئی فون ڈؤو کا مقابلہ کرنے کے لیے اپنے منافع کے مارجن کا کچھ حصہ قربان کیا۔

گلیکسی زیڈ فولڈ 8 میں فلیکس موڈ بھی ختم کر دیا گیا ہے اور ممکن ہے کہ یہ بھی قیمت کو 1899 ڈالر کی سطح پر برقرار رکھنے کے لیے اخراجات کم کرنے کی حکمت عملی کا حصہ ہو۔