جینیفر ونگٹ کی گوا میں دیسی شادی، ویڈیوز نے سوشل میڈیا پر دھوم مچا دی

بھارتی ٹیلی وژن کی مقبول اداکارہ جینیفر ونگٹ کی شادی کی تقریبات کی نئی تصاویر اور ویڈیوز سوشل میڈیا پر تیزی سے پھیل رہی ہیں۔ اداکارہ نے سنگاپور سے تعلق رکھنے والے کاروباری شخصیت ولیم اشمائل کے ساتھ بھارتی شہر گوا میں دیسی انداز کی شادی کی تقریبات منعقد کی ہیں۔

جینیفر اور ولیم نے اس سے قبل 16 جولائی کو برطانیہ کے علاقے ویسٹ ویلز میں مسیحی طریقے سے شادی کی تھی۔ اب دونوں نے گوا میں ایک مرتبہ پھر شادی کی تقریبات کا اہتمام کیا، جہاں بھارتی روایات اور رنگا رنگ ماحول نے تقریب کو مزید خاص بنا دیا۔

گوا میں ہونے والی تقریبات کی اندرونی ویڈیوز بھی منظرعام پر آگئی ہیں۔ ان ویڈیوز میں جینیفر اپنے دوستوں کے ساتھ شادی کی خوشیاں بھرپور انداز میں مناتی ہوئی نظر آتی ہیں اور ان کے چہرے سے خوشی نمایاں ہے۔

ایک اور ویڈیو میں جینیفر اپنی قریبی دوست جینیلیا دیشمکھ سے ملاقات کرتی ہیں اور انہیں گلے لگا کر گرمجوشی سے خوش آمدید کہتی ہیں۔ شادی کی یہ جھلکیاں سامنے آنے کے بعد مداحوں کی جانب سے بھی جوڑے کے لیے نیک خواہشات کا اظہار کیا جارہا ہے۔