انسان بمقابلہ ٹرمنیٹر، منفرد فائٹ نے سوشل میڈیا پر دھوم مچا دی

امریکا میں انسان اور روبوٹ کے درمیان ایک منفرد فائٹ نے سوشل میڈیا پر دھوم مچا دی۔ فائٹ میں امریکی انفلوئنسر اور کانٹینٹ کریئیٹر فرینکی لاپینا نے تقریباً چھ فٹ قد کے ہیومنائیڈ روبوٹ کا سامنا کیا۔

یہ غیر معمولی مقابلہ امریکی روبوٹکس کمپنی آر ای کے کی جانب سے سان فرانسسکو میں منعقد کیا گیا۔ کمپنی کے مطابق اس منصوبے کا مقصد ایسے ورچوئل ریئلٹی گیمنگ تجربے کو فروغ دینا ہے جس میں انسان دور بیٹھ کر ہیومنائیڈ روبوٹس کو کنٹرول کرتے ہوئے ایک دوسرے کے خلاف مقابلہ کر سکیں۔

وائرل ہونے والی ویڈیو میں روبوٹ کو مقابلے سے قبل ایک پیشہ ور فائٹر کی طرح وارم اَپ کرتے دیکھا جا سکتا ہے۔ مقابلہ شروع ہونے کے بعد لاپینا نے روبوٹ پر مکوں سے حملہ کیا جبکہ روبوٹ نے ککس اور دیگر طاقتور وار کیے۔

کمپنی آر ای کے نے اس مقابلے کو ایک تاریخی لمحہ قرار دیتے ہوئے سوشل میڈیا پلیٹ فارم ایکس پر دعویٰ کیا کہ یہ پہلی انسان بمقابلہ ٹرمینیٹر روبوٹ فائٹ تھی۔

مقابلے کی ویڈیو وائرل ہونے کے بعد صارفین نے دلچسپ سوالات بھی اٹھائے کہ اگر کسی پیشہ ور فائٹر کا روبوٹ سے مقابلہ ہو تو کیا روایتی فائٹنگ تکنیکیں مؤثر ثابت ہوں گی؟ بعض صارفین کا کہنا تھا کہ روبوٹ سے مقابلہ انسان سے لڑنے سے بالکل مختلف ہے اور صرف مکے مارنا شاید روبوٹ پر وہ اثر نہ ڈال سکے جو کسی انسان پر ہوتا ہے۔

اس منفرد مقابلے نے ایک بار پھر ریموٹ کنٹرول ہیومنائیڈ روبوٹس، ورچوئل ریئلٹی گیمنگ اور انسان و مشین کے مستقبل کے تعلق پر بحث چھیڑ دی ہے۔