عاطف اسلم کے کنسرٹ میں مداح نے اسٹیج پر موبائل پھینک دیا، گلوکار بھی دنگ رہ گئے

پاکستان کے معروف گلوکار عاطف اسلم کے کنسرٹ کی ایک دلچسپ ویڈیو سوشل میڈیا پر وائرل ہو رہی ہے جس میں ایک مداح نے پرفارمنس کے دوران اپنا موبائل فون اسٹیج پر پھینک دیا۔

اس حالیہ کنسرٹ کی ویڈیو میں دیکھا جا سکتا ہے کہ عاطف اسلم گانا گا رہے ہیں اور اچانک مداح ان پر موبائل پھینکنے لگ جاتے ہیں۔ جیسے ہی موبائل ان کے قریب گرتے ہیں تو وہ پرفارمنس روک کر فون اٹھاتے ہیں اور مذاق کرتے ہوئے کہتے ہیں کہ ’’فون ہی پھینک دیا اوپر، یہ تو ٹوٹ چکا ہو گا اب تک۔‘‘

اسی ویڈیو میں ایک اور مداح کو مبینہ طور پر اپنا سبز دوپٹہ بھی اسٹیج پر پھینکتے دیکھا جا سکتا ہے۔

ویڈیو سامنے آنے کے بعد سوشل میڈیا پر کنسرٹس کے دوران مداحوں کے رویے پر بحث چھڑ گئی، جبکہ عاطف اسلم کا موبائل ملنے پر دیا گیا ردعمل بھی صارفین کی توجہ حاصل کر رہا ہے۔