امریکی پابندیوں کی دھمکی کے باوجود ایرانی طیارہ چین پہنچ گیا

امریکی پابندیوں کی دھمکی کے باوجود ایرانی ایئرلائن مَہان ایئر کی ایک پرواز ایران سے چین پہنچ گئی ہے۔

فلائٹ ٹریکنگ ویب سائٹ فلائٹ ریڈار 24 کے مطابق مَہان ایئر کی پرواز نے چین کے شہر گوانگ ژو میں لینڈ کیا۔

رپورٹ کے مطابق پرواز IRM093 بدھ کو مقامی وقت کے مطابق شام 4 بج کر 39 منٹ پر گوانگ ژو پہنچی۔ فلائٹ ریڈار 24 کے اعداد و شمار میں طیارے کی منزل گوانگ ژو کا بائیون انٹرنیشنل ایئرپورٹ ظاہر ہوئی۔

تاہم گوانگ ژو بائیون ایئرپورٹ کی سرکاری ویب سائٹ پر اس پرواز کو آمد کی فہرست میں شامل نہیں کیا گیا تھا۔ اس وجہ سے پرواز کی لینڈنگ سے متعلق دستیاب معلومات بنیادی طور پر فلائٹ ٹریکنگ ڈیٹا پر مبنی ہیں۔

یہ پیش رفت ایسے وقت سامنے آئی ہے جب امریکا نے ایرانی ایئرلائنز کے خلاف پابندیوں کا دائرہ مزید بڑھانے کی دھمکی دی ہے۔ امریکی وزیر خزانہ اسکاٹ بیسنٹ نے کہا تھا کہ 23 ستمبر سے ایرانی ایئرلائنز کے ساتھ کاروبار یا انہیں خدمات فراہم کرنے والے اداروں کو امریکی پابندیوں کا سامنا کرنا پڑ سکتا ہے۔

مَہان ایئر پہلے ہی امریکی پابندیوں کی زد میں ہے۔ واشنگٹن کا مؤقف ہے کہ مَہان ایئر ایران کے پاسداران انقلاب سے متعلق سرگرمیوں میں معاونت کرتی رہی ہے، جبکہ ایران ان امریکی پابندیوں کو مسترد کرتا ہے۔

امریکی دباؤ کے باوجود چین نے ایرانی ایئرلائنز پر ممکنہ امریکی پابندیوں کی مخالفت کی ہے۔ چینی وزارت خارجہ نے کہا ہے کہ وہ ایسے یکطرفہ اقدامات کی مخالفت کرتا ہے جن کی بنیاد بین الاقوامی قانون یا اقوام متحدہ کی سلامتی کونسل کی اجازت پر نہ ہو۔

مَہان ایئر کی تہران سے گوانگ ژو پروازیں حالیہ دنوں میں بھی جاری رہی ہیں اور فلائٹ ریڈار 24 کے ریکارڈ میں اس روٹ پر متعدد پروازوں کی لینڈنگ دکھائی گئی ہے۔