کانگو میں فوجی طیارہ گر کر تباہ، افسران سمیت 14 افراد ہلاک

جمہوریہ کانگو میں ایک فوجی طیارہ حادثے کا شکار ہو گیا، جس میں کم از کم 14 افراد ہلاک ہوئے ہیں۔

حادثہ جمعہ کوانگو کے شہر کینج میں پیش آیا۔ ابتدائی اطلاعات کے مطابق طیارہ کِک وِٹ سے دارالحکومت کنشاسا جا رہا تھا کہ اسے فنی خرابی کا سامنا کرنا پڑا۔\

پائلٹ نے کینج میں اترنے کی کوشش کی، تاہم وہاں مناسب رن وے دستیاب نہ ہونے کے باعث طیارہ ایک رہائشی علاقے میں گر کر تباہ ہوگیا۔

کانگو کی فوج کے مطابق ہلاک ہونے والوں میں دو اعلیٰ فوجی افسران بھی شامل تھے، جن میں فوجی عدالت کے سربراہ اور مسلح افواج کے آڈیٹر جنرل شامل ہیں۔

دیگر ہلاک شدگان میں فوجی اہلکار، وفد کے ارکان اور طیارے کا عملہ شامل تھا۔

حادثے میں زیادہ تر لاشیں بری طرح جل گئی تھیں، جس کے باعث شناخت کا عمل بھی مشکل ہوگیا۔

حادثے کی حتمی وجہ ابھی معلوم نہیں ہوئی اور حکام نے واقعے کی تحقیقات شروع کردی ہیں۔ بعض مقامی رپورٹس میں ہلاکتوں کی تعداد 13 یا اس سے زیادہ بھی بتائی گئی تھی، لیکن کانگو کی فوج کی تازہ اطلاع کے مطابق تعداد 14 ہے۔