اکشے کھنہ نے ممبئی کے مالابار ہل میں تقریباً ایک ارب کا گھر خرید لیا

بالی ووڈ اداکار اکشے ونود کھنہ نے ممبئی کے معروف علاقے مالابار ہل میں کروڑوں روپے مالیت کا لگژری اپارٹمنٹ خرید لیا ہے۔ پراپرٹی رجسٹریشن دستاویزات کے مطابق اداکار نے اس گھر کے لیے 33.26 کروڑ بھارتی روپے ادا کیے ہیں، جو پاکستانی روپوں میں تقریباً ایک ارب کے برابر ہیں۔ یہ لین دین ستمبر 2026 میں رجسٹر ہوا۔

دستاویزات کے مطابق اپارٹمنٹ کا کارپٹ ایریا 2,341.39 مربع فٹ ہے، جبکہ اس کے ساتھ 175.45 مربع فٹ کا بالکنی ایریا بھی موجود ہے۔ یوں کارپٹ اور بالکنی کو ملا کر مجموعی رقبہ 2,516.84 مربع فٹ بنتا ہے۔ پراپرٹی کے ساتھ تین پارکنگ یونٹس بھی شامل ہیں۔

اس مہنگی پراپرٹی ڈیل پر تقریباً 1.99 کروڑ روپے اسٹامپ ڈیوٹی ادا کی گئی، جبکہ رجسٹریشن فیس 30 ہزار روپے رہی۔ پراپرٹی 30 لٹل گِبز، مالابار ہل روڈ پر واقع ہے۔

ممبئی کا مالابار ہل شہر کے مہنگے اور معروف رہائشی علاقوں میں شمار ہوتا ہے۔ جنوبی ممبئی میں واقع اس علاقے کی خاص بات اس کا سمندر سے قریب ہونا اور شہر کے اہم کاروباری و تفریحی مراکز تک آسان رسائی ہے۔ نیپیئن سی روڈ، والکیشور روڈ اور پیڈر روڈ کے ذریعے یہ علاقہ میرین ڈرائیو، نریمان پوائنٹ اور کولابا جیسے اہم مقامات سے جڑا ہوا ہے۔

اکشے کھنہ کئی دہائیوں پر محیط فلمی کیریئر میں مختلف نوعیت کے کردار نبھا چکے ہیں۔ حالیہ عرصے میں ’دھرندھر‘ میں رحمان ڈکیت کے کردار نے بھی انہیں خاص توجہ دلائی۔ فلم میں ان کی مکالموں کی ادائیگی، کردار کی شدت اور منفرد اسکرین موجودگی کو ناظرین نے نمایاں طور پر سراہا۔ اس کے علاوہ وہ ’چھاوا‘ میں وکی کوشل کے مقابل اورنگزیب کے کردار میں بھی نظر آئے تھے۔