بنکاک کی سیلاب زدہ سڑک پر جیٹ سکی چلانا مہنگا پڑ گیا، شہری گرفتار

تھائی لینڈ کے دارالحکومت بنکاک میں سیلاب سے بھری سڑک پر جیٹ سکی چلانے والے شخص کو پولیس نے گرفتار کر لیا۔

واقعہ بنکاک کی نیو فیچابوری روڈ پر پیش آیا جہاں شدید بارشوں کے بعد سڑکیں زیرِ آب آگئی تھیں۔

سوشل میڈیا پر وائرل ویڈیو میں ایک شخص کو سیلابی پانی میں جیٹ سکی تیز رفتاری سے چلاتے اور خطرناک موڑ کاٹتے دیکھا گیا۔

جیٹ سکی کے باعث اٹھنے والی لہریں قریبی گھروں تک پہنچیں جس سے بعض رہائشیوں کی املاک کو بھی نقصان پہنچا۔

دلچسپ بات یہ ہے کہ مذکورہ شخص نے خود بھی اپنی تصویر سوشل میڈیا پر ’بی کے کے ڈرفٹ‘ کے کیپشن کے ساتھ شیئر کی تھی۔

پولیس کے ہاتھوں گرفتار ہونے کے بعد اس نے بتایا کہ اسے ٹریفک قوانین کا علم نہیں تھا جبکہ ایک غیر ملکی دوست نے ویڈیو بنانے کی ترغیب دی تھی۔

اس کا کہنا تھا کہ اس نے سیلاب سے پریشان لوگوں کا حوصلہ بڑھانے کیلئے ایسا کیا، تاہم یہ کوشش اسے پولیس اسٹیشن تک لے گئی۔

واضح رہے کہ شدید بارشوں کے باعث بنکاک کے مختلف علاقے سیلاب سے متاثر ہوئے ہیں اور ہزاروں افراد کو عارضی پناہ گاہوں میں منتقل کیا گیا ہے۔