معمر رانا نے جذباتی انداز میں اپنی طلاق کا اعتراف کرلیا

پاکستانی فلموں کے معروف اداکار معمر رانا نے اپنی ازدواجی زندگی کے بارے میں گفتگو کرتے ہوئے طلاق سے متعلق خبروں کی تصدیق کی ہے۔

اداکار کے مطابق طلاق کا عمل آگے بڑھ چکا ہے اور وہ اس سلسلے میں عدالتی دستاویزات پر دستخط بھی کر چکے ہیں، تاہم وہ اب بھی چاہتے ہیں کہ ان کا ازدواجی رشتہ ختم نہ ہو۔

ایک حالیہ انٹرویو میں جذباتی گفتگو کرتے ہوئے معمر رانا نے بتایا کہ زندگی کے اس مشکل مرحلے میں ان کے بھائیوں نے ان کا ساتھ دیا، لیکن اب ان کی اہلیہ اور بچے ان کے ساتھ نہیں ہیں۔ ان کا کہنا تھا کہ وہ آج بھی اپنے اہل خانہ سے محبت کرتے ہیں اور دستخط کرنے کے باوجود دل سے دعا کرتے ہیں کہ ان کا رشتہ برقرار رہے۔

اداکار ان دنوں ذاتی زندگی کے مشکل فیصلوں کے ساتھ اپنے پیشہ ورانہ سفر میں بھی اتار چڑھاؤ کا سامنا کر رہے ہیں۔ فلموں میں کام کرنے کے علاوہ وہ پنجابی تھیٹر کے ڈراموں میں بھی حصہ لیتے رہے ہیں۔ طلاق کے معاملے پر ان کا حالیہ جذباتی بیان سوشل میڈیا پر تیزی سے گردش کر رہا ہے۔