باغبانی کی عادت صحت کے لیے مفید، کینسر سمیت کئی بیماریوں کے خطرات کم ہوسکتے ہیں

باغبانی صرف پودے اگانے یا گھر کے ماحول کو خوب صورت بنانے کا ذریعہ نہیں، بلکہ یہ جسمانی اور ذہنی صحت کے لیے بھی فائدہ مند ثابت ہوسکتی ہے۔

ایک تحقیق کے مطابق باغ میں کام کرنے سے غذائیت بہتر بنانے، جسمانی سرگرمی بڑھانے اور ذہنی دباؤ و اضطراب کم کرنے میں مدد مل سکتی ہے، جبکہ یہ عوامل بعض بیماریوں کے خطرات گھٹانے میں بھی اہم کردار ادا کرتے ہیں۔

یونیورسٹی آف کولوراڈو بولڈر کے شعبہ ماحولیات سے وابستہ پروفیسر اور تحقیق کی سینئر مصنفہ جل لٹ نے عام صحت کے مسائل سے بچاؤ کے ممکنہ طریقوں کا جائزہ لینے کے لیے دو گروپوں پر مشتمل مطالعہ کیا۔ ایک گروپ کو کمیونٹی گارڈن میں باغبانی کا موقع دیا گیا، جبکہ دوسرے گروپ کو اس سرگرمی کا آغاز کرنے کے لیے ایک سال انتظار کرنا پڑا۔

باغبانی کرنے والے گروپ کو ابتدائی تربیتی کورس، بیج اور کام کے لیے زمین کا ایک مخصوص قطعہ فراہم کیا گیا۔ اس دوران پورے سال دونوں گروپوں کی جسمانی اور ذہنی صحت کا جائزہ لیا جاتا رہا۔

تحقیق کے نتائج کے مطابق باغبانی کرنے والے افراد نے دوسرے گروپ کے مقابلے میں زیادہ غذائیت سے بھرپور خوراک استعمال کی۔ ان کی روزانہ فائبر کی مقدار میں بھی سات فیصد اضافہ ریکارڈ کیا گیا۔ یونیورسٹی آف ساؤتھ کیرولائنا کے کینسر پریوینشن اینڈ کنٹرول پروگرام کے ڈائریکٹر جیمز ہیبرٹ نے اس تبدیلی کو اہم قرار دیتے ہوئے میڈیکل نیوز ٹوڈے کو بتایا کہ فائبر کی مقدار میں معمولی اضافہ بھی صحت پر نمایاں مثبت اثرات مرتب کرسکتا ہے۔

غذائی بہتری کے ساتھ باغبانی کرنے والے افراد کی جسمانی سرگرمی میں بھی اضافہ ہوا۔ تحقیق میں شامل اس گروپ نے ہر ہفتے اپنی جسمانی سرگرمی کے دورانیے میں اوسطاً 42 منٹ کا اضافہ کیا۔ مطالعے کے مطابق باغبانی نے شرکاء کو جسمانی طور پر زیادہ متحرک رہنے کا ایک اضافی موقع فراہم کیا۔

اس سرگرمی کا ایک اور فائدہ ذہنی دباؤ اور اضطراب میں کمی کی صورت میں سامنے آیا۔ سانتا باربرا کے سینٹ جانز کینسر انسٹی ٹیوٹ سے وابستہ آنکولوجی نرس اور پروفیسر ربیکا کرین اوکاڈا کے مطابق باغبانی سے حاصل ہونے والے یہ فوائد کینسر، ہائی بلڈ پریشر اور ٹائپ 2 ذیابیطس جیسی بیماریوں کے خطرات کم کرنے میں مددگار ہوسکتے ہیں۔

ماہرین کی رائے اور تحقیق کے نتائج کی روشنی میں باغبانی کو روزمرہ زندگی میں جسمانی سرگرمی اور بہتر غذائی عادات اپنانے کا ایک آسان ذریعہ سمجھا جاسکتا ہے۔ تاہم یہ بیماریوں سے بچاؤ کی ضمانت نہیں، بلکہ صحت مند طرزِ زندگی کا ایک مفید حصہ ہے۔