کراچی؛ ہائی روف کی ٹکر سے موٹرسائیکل سوار نوجوان جاں بحق، ڈرائیور گرفتار
متوفی نوجوان اسی علاقے کا رہنے والا تھا، لاش ورثا کے حوالے کردی گئی
کراچی:
عزیزآباد کے علاقے میں ہائی روف کی ٹکر سے موٹرسائیکل سوار نوجوان جاں بحق ہوگیا ۔ پولیس نے حادثے کے ذمے دار ڈرائیور کو گرفتار کر لیا ۔
تفصیلات کے مطابق عزیز آباد 2 نمبر حسین آباد نجی اسپتال کے قریب ہائی روف کی ٹکر سے موٹرسائیکل سوار نوجوان جاں بحق ہوگیا ، جس کی لاش چھیپا ایمبولینس کے ذریعے عباسی شہید اسپتال منتقل کی گئی ۔
ایس ایچ او عزیزآباد انسپکٹر غلام یاسین نے بتایا کہ جاں بحق ہونے والے نوجوان کی شناخت 17 سالہ محمد آصف ولد محمد نوید کے نام سے کی گئی ، متوفی عزیزآباد ہی کا رہائشی تھا ۔
پولیس نے موقع پر پہنچ کر حادثے کے ذمے دار ہائی روف کے ڈرائیور تاج الدین کو گرفتار کر کے گاڑی قبضے میں لے لی ۔
جاں بحق ہونے والے نوجوان کی لاش قانونی کارروائی کے بعد ورثا کے حوالے کر دی گئی ۔