مصری پارلیمنٹ نے سعودی عرب کے دفاع کے لیے فوجی تعاون کی منظوری دے دی

مصری پارلیمنٹ نے صدر عبدالفتاح السیسی کو سعودی عرب کے دفاع کے لیے ضرورت پڑنے پر فوجی معاونت فراہم کرنے کی اجازت دے دی ہے۔

یہ فیصلہ ایسے وقت میں کیا گیا ہے جب یمن کے حوثی گروپ کے سعودی عرب پر میزائل اور ڈرون حملوں میں اضافہ ہوگیا ہے۔

پارلیمانی منظوری بند کمرہ اجلاس میں دی گئی، جہاں دو تہائی ارکان نے صدر السیسی کی درخواست کی حمایت کی۔

مصری آئین کے تحت بیرونِ ملک فوجی کارروائی یا جنگی مشن کے لیے پارلیمنٹ کی دو تہائی منظوری ضروری ہے۔

صدر السیسی پہلے ہی واضح کرچکے ہیں کہ مصر کی ممکنہ فوجی کارروائی صرف دفاعی نوعیت کی ہوگی۔ یعنی مصری افواج کا مقصد سعودی عرب کی سرزمین، سرحدوں، خودمختاری اور مقدس مقامات کا دفاع ہوگا، جبکہ یمن پر حملہ کرنے یا حوثیوں کے خلاف براہِ راست جارحانہ کارروائی کا ارادہ نہیں۔