ٹیکسٹائل سٹی اور کے الیکٹرک کول پاور پلانٹ لگانے پر متفق

ٹیکسٹائل سٹی میں ویلیوایڈڈ ٹیکسٹائل انڈسٹریل یونٹس کو رعایتی ٹیرف پربجلی کی فراہمی کے ساتھ اسٹیم اور گرم پانی مہیا کرنے کے لیے کے الیکٹرک کے ساتھ600 میگاواٹ کے حامل کول پاور کا مشترکہ منصوبہ زیرغور ہے، مجوزہ منصوبہ کے الیکٹرک نے پیش کیا ہے۔


یہ بات پاکستان ٹیکسٹائل سٹی کے 58 ویں بورڈ آف ڈائریکٹرزاجلاس میں بتائی گئی جس کی صدارت ٹیکسٹائل سٹی کے چیئرمین ڈاکٹر مرزا اختیار بیگ نے کی، دوران اجلاس کے الیکٹرک کے بزنس ڈیولپمنٹ ہیڈ ڈاکٹر سید نوید احمد اور ڈپٹی ڈائریکٹر عامر طلعت نے مجوزہ مشترکہ کول پاورپروجیکٹ کے بارے میں تفصیلی پریزنٹیشن دی جس پرپاکستان ٹیکسٹائل سٹی بورڈاور کے الیکٹرک نے اس ضمن میں باقاعدہ معاہدے پررضامندی ظاہر کرتے ہوئے معاہدے کی سفارشات منظوری کے لیے وفاقی وزارت ٹیکسٹائل کو ارسال کردیں۔ واضح رہے کہ کے الیکٹرک اس سے قبل بھی پاکستان ٹیکسٹائل سٹی کے ساتھ 50 میگاواٹ بجلی کی بلاتعطل فراہمی کا معاہدہ کرچکی ہے ۔

جس کے لیے مطلوبہ انفرااسٹرکچربھی مکمل کردیا گیا ہے۔ یہاں یہ امرقابل ذکر ہے کہ پاکستان ٹیکسٹائل سٹی کا یہ پروجیکٹ تکمیل کے بعد 80 ہزار سے زائد افراد کو ملازمتیں فراہم کرنے کے علاوہ ملک کے لیے گرانقدر ایکسپورٹ اور قومی خزانے کو کثیر ریونیوجنریٹ کرنے کا باعث بنے گا۔ اجلاس میں بورڈ ڈائریکٹر نیشنل بینک کے ایگزیکٹو وائس پریذیڈنٹ وجاہت اے بقائی، ڈائریکٹر جنرل پورٹ قاسم اتھارٹی شبیر انور قاضی، سعودی پاک انڈسٹریل اینڈ ایگریکلچرل انویسٹمنٹ کے سینئر وائس پریذیڈنٹ شیخ آفتاب احمد، وزارت صنعت کے جوائنٹ سیکریٹری ضرار حیدر، این آئی بی بینک کے گروپ ہیڈ شاہ مفتاح العظیم، وزارت ٹیکسٹائل کے ڈپٹی سیکریٹری محمد صلاح الدین اور پاکستان ٹیکسٹائل سٹی کے چیف ایگزیکٹو آفیسر محمد حنیف کسباتی نے بھی شرکت کی۔