امریکی گلوکارہ جینیفر لوپیز کی غیر مہذب پرفارمنس نے تنازع کھڑا کردیا

امریکی گلوکارہ جینیفر لوپیز کے غیر مہذب رقص اور اسے ٹی وی پر دکھائے جانے پر مراکش میں وزیر مواصلات سے مستعفی ہونے کا مطالبہ کیا جا رہا ہے۔


مراکش کی میڈیا کے مطابق رباط میں امریکی گلوکارہ جینیفر لوپیز کے ہونے والے کانسرٹ کو میڈیا پر دکھایا گیا اور جینیفر نے اس کانسرٹ میں نہ صرف غیر مہذب لباس پہنا بلکہ انتہائی بیہودہ رقص بھی کیا۔ حکمراں جماعت جسٹس اینڈ ڈیولپمنٹ پارٹی کے اعلیٰ عہدیداروں کا کہنا ہے کہ موازین فیسٹیول میں جینیفر لوپیز کی پرفارمنس غیر مہذب تھی۔ وزیر برائے مواصلات مصطفیٰ خلفی نے یہ پرفارمنس ٹی وی پر لائیو دکھائے جانے کی اجازت دی تھی جس کے باعث ان پر تنقید کی جا رہی ہے۔ مقامی میڈیا کے مطابق مصطفیٰ نے مستعفی ہونے کے مطالبے رد کردیے ہیں۔

جینیفر لوپیز نے جمعہ کو ایک لاکھ 60 ہزار افراد کے مجمعے کے سامنے پرفارم کیا تھا۔ یہ فیسٹیول معمولی تاخیر کے ساتھ 2ایم پبلک ٹی وی نیٹ ورک پر دکھایاگیا تھا۔ تاہم مقامی میڈیا نے جینیفر لوپیز کو ان کی حرکات اور لباس کے حوالے سے تنقید کا نشانہ بنایا۔ کئی ارکان اسمبلی نے مطالبہ کیا ہے کہ اجلاس طلب کیا جائے جس میں اس بات پر بحث کی جائے کہ کیا یہ فیسٹیول ٹی وی پر دکھایا جانا چاہیے تھا یا نہیں۔