فکسنگ اسکینڈل شرجیل خان کی بطور گواہ پیشی پر فیصلہ محفوظ

پی ایس ایل اسپاٹ فکسنگ کیس میں شرجیل خان بطور گواہ پیش ہونگے یا نہیں، ٹریبیونل نے فیصلہ محفوظ کرلیا،پی سی بی کی درخواست پر جرح مکمل ہوگئی،اوپنر کے وکیل شیغان اعجاز کا کہنا ہے کہ قانون کے مطابق فیصلے کی امید ہے۔


تفصیلات کے مطابق پی ایس ایل اسپاٹ فکسنگ کیس میں شرجیل خان کو بطور گواہ پیش کرنے کیلیے بی سی بی کی درخواست پر جرح مکمل ہو گئی اور ٹریبیونل نے فیصلہ محفوظ کر لیا ہے۔اوپنر کے وکیل شیغان اعجاز نے کہا ہے کہ اس معاملے میں ٹریبیونل سے قانون کے مطابق فیصلے کی امید ہے، پی سی بی کو پاکستانی عدالتوں سے کوئی ریفرنس نہیں ملا تو کولکتہ کی عدالت کا فیصلہ پیش کیا ہے۔ پی سی بی کے قانونی مشیر تفضل رضوی نے کہا کہ ٹریبیونل نے ہماری درخواست پرفیصلہ محفوظ کر لیا ہے، کولکتہ کا عدالتی فیصلہ ٹریبیونل کے سامنے پیش کرنے کے سوال پر انھوں نے کہا کہ ٹریبیونل پاکستانی قوانین نہیں، اینٹی کرپشن کوڈ کے تحت بنا ہے اور اس پر قانون شہادت کا اطلاق نہیں ہوتا بلکہ ٹریبیونل کو اپنا لائحہ عمل خود تشکیل دینا ہوتا ہے۔

اسی لیے غیرملکی عدالت کے فیصلے کو ٹریبیونل میں پیش کیا گیا جس کا مقصد صرف یہ بتانا تھا کہ ایک شخص سچ سے کیوں بھاگ رہا ہے، تاہم اس حوالے سے حتمی فیصلہ ٹریبیونل نے ہی کرنا ہے۔ یاد رہے کہ تفضل رضوی گزشتہ چند سماعتوں میں باربار یہ موقف دہراتے رہے ہیں کہ شرجیل خان پر بی سی بی کی جرح سے اسپاٹ فکسنگ اسکینڈل کے بارے میں مزید حقائق سامنے آسکتے ہیں لیکن انھوں نے راہ فرار اختیارکرلی،اگر وہ بے قصور ہوتے تو سچ کا سامنا کرنے سے نہ گھبراتے۔