بدعنوانوں سے سائنسی بنیادوں پر تحقیقات کریں چیئرمین نیب

قومی احتساب بیورو کے چیئرمین جسٹس جاوید اقبال نے کہا ہے کہ نیب ملک سے بدعنوانی کے خاتمے اور بدعنوان عناصر سے قوم کی لوٹی گئی رقم برآمد کر کے قومی خزانے میں جمع کرانے کیلیے قائم کیا گیا تھا۔


نیب میں کام کرنے والے افسران، اہلکاروں کا تعلق کسی پارٹی، شخص سے نہیں بلکہ ریاست اور نیب سے تعلق ہونا بنیادی بات ہے، افسران ٹرانسپیرنسی، شفافیت، شواہد اور قانون کے دائرے میں رہتے ہوئے سائنسی بنیادوں پر اپنی انکوائریوں اور تحقیقات کو مکمل کریں تاکہ بدعنوان عناصر کو ٹھوس شواہد کی بنیاد پر معزز احتساب عدالتوں، ہائی کورٹس اور سپریم کورٹ آف پاکستان سے سزا دلوائی جا سکے۔

اس سے نہ صرف نیب کے کام میں بہتری آئے گی بلکہ ادارے کی ساکھ میں بھی اضافہ ہو گا، ان خیالات کا اظہار انھوں نے نیب کے آپریشن ڈویژن کی کارکردگی کا نیب ہیڈکوارٹر میں جائزہ لیتے ہوئے کیا، انھوں نے کہا کہ میری اولین ترجیح بدعنوانی کے خاتمے کیلیے زیرو ٹالرنس کی پالیسی اور خود احتسابی ہے، نیب میں صرف اور صرف میرٹ، شفافیت اور قانون کے مطابق انکوائریوں، تحقیقات کو مکمل کیا جائے گا، افسران، اہلکاروں کی ترقی کے تمام معاملات کو میں خود دیکھوں گا۔