دپیکا اور رنویر کی شادی کی پہلی تصویر منظرعام پر آگئی

 ممبئی: نامور بالی ووڈ اداکارہ دپیکا پڈوکون نے شادی کے بعد اپنی اور رنویر سنگھ کی پہلی تصویر مداحوں کے ساتھ شیئر کردی ہے۔

بھارتی میڈیا رپورٹس کے مطابق دپیکا اور رنویر کی شادی کے بعد سے پرستاروں کو تصاویر کا بے صبری سے انتظار تھا جسے دونوں اداکاروں نے گزشتہ روز ہی اٹلی میں شادی کے بندھن میں بندھنے کے بعد تصاویر کو صیغہ راز میں رکھا ہوا تھا لیکن اب اداکارہ نے اپنی اور شوہر رنویر سنگھ کی شادی کی پہلی تصویر سماجی رابطے کی ویب سائٹ انسٹا گرام پر جاری کردی۔

اداکارہ کی جانب سے شادی کی جاری کردہ تصاویر میں دپیکا پڈوکون سرخ رنگ کے لباس میں نہایت حسین لگ رہی ہیں جب کہ رنویر سنگھ ونکنی رواج کے مطابق سفید کرتے میں ہاتھ میں سونے کا ہار لئے چہرے پر مسکراہٹ سجائے بیٹھے ہوئے ہیں جب کہ مداحوں کی مقبول ترین جوڑی سے محبت کا اندازہ اس بات سے لگایا جاسکتا ہے کہ صرف 10 منٹ میں جاری کردہ تصویر کو نو لاکھ سے زائد شائقین لائیک کر چکے ہیں۔

واضح رہے کہ دپیکا پڈوکون اور رنویر سنگھ 14 نومبر کی شام اٹلی کے خوبصورت مقام لیک کومو میں رشتہ ازدواج میں منسلک ہوئے تھے اور آج ایک بار پھر ان کی شادی سندھی رسم رواج کے مطابق ہوئی جب کہ اداکاروں کی شادی کے استقبالیے کی دو تقاریب بھارت میں بھی منعقد ہوں گی، پہلی تقریب 21 نومبر کو بنگلورو کے لیلا پیلس اور دوسری 28 نومبر کو ممبئی کے گرینڈ ہائٹ ہوٹل میں ہوگی۔