ٹرمپ نے خود کو حاضر دماغ اور ذہین انسان قرار دیدیا

لاہور:
امریکی صدر ڈونلڈ ٹرمپ نے اپنے شخصیت پر لکھی گئی کتاب کو مسترد کرتے ہوئے کہا ہے کہ میں احمق نہیں بلکہ ہمیشہ سے حاضر دماغ اور ذہین ہوں۔

ڈونلڈ ٹرمپ نے ٹوئٹس میں خود اپنی تعریف کرتے ہوئے کہا کہ دماغی صلاحیتوں میں استحکام اور حاضر دماغی میری پوری زندگی کے دو عظیم اثاثے ہیں، چالاک ہیلری کلنٹن نے ان کارڈز کا بھرپور استعمال کیا ہے۔

....Actually, throughout my life, my two greatest assets have been mental stability and being, like, really smart. Crooked Hillary Clinton also played these cards very hard and, as everyone knows, went down in flames. I went from VERY successful businessman, to top T.V. Star.....

ڈونلڈ ٹرمپ نے کہا کہ میں ایک کامیاب کاروباری انسان، ٹاپ ٹی وی اسٹار اور اب امریکا کا صدر ہوں، میرا خیال ہے اب میں صرف ایک حاضر دماغ انسان نہیں بلکہ ذہین ترین شخص کہلانے کے لائق ہوں۔

....to President of the United States (on my first try). I think that would qualify as not smart, but genius....and a very stable genius at that!

خیال رہے کہ ہر وقت تنازعات میں گھرے رہنے والے ڈونلڈ ٹرمپ کے عہدِ صدارت کے ایک سال مکمل ہونے پر امریکی صحافی مائیکل وولف نے ''فائر اینڈ فیوری'' کے نام سے کتاب تحریر کی ہے جس میں انہوں نے ٹرمپ کی شخصیت سے متعلق انکشافات کرتے ہوئے انہیں مضحکہ خیز اور احمق آدمی قرار دیا ہے جو اپنے ملازموں پر شک کرتا ہے اور ہروقت چیختا چلاتا رہتا ہے۔

یہ پڑھیں: ڈونلڈ ٹرمپ پر لکھی گئی کتاب میں حیرت انگیز انکشافات

یہ کتاب 9 جنوری کو فروخت کےلیے پیش کی جائے گی تاہم اس کے چند مندرجات منظر عام پر آتے ہی ایمیزون کی ویب سائٹ پر اس کی فروخت سے قبل بے شمار آرڈر آچکے ہیں جس کی بنا پر اسے پہلے ہی سے بیسٹ سیلر کتاب قرار دیا جارہا ہے۔

دوسری جانب ٹرمپ انتظامیہ نے اس کتاب پر پابندی لگانے پر غور شروع کردیا ہے اور ٹرمپ اپنے قانونی ماہرین سے مشاورت کے ذریعے کتاب کے مصنف مائیکل وولف اور پبلشر پر ہتکِ عزت کے دعوے پر بھی غور کررہے ہیں۔